Ukrayna "Antiböhran Ekspert Nüvə Mərkəzi"nin həmtəsisçisi Olqa Koşarnaya MAQATE-nin baş direktoru Rafael Qrossinin işğal olunmuş Ukrayna Zaporojye Atom Elektrik Stansiyasında (AES) ruslarla görüşü zamanı göstərdiyi davranışı kəskin tənqid edib.

Valyuta.az xəbər verir ki, bu barədə Unian yazır.

“MAQATE əlaqələri saxlamağa məcburdur. Və Qrossi diplomat kimi deyir ki, “mən bütün tərəflərlə əlaqələri saxlamağa borcluyam”. O da əlaqələri saxlayır, bu il Putinlə, dəfələrlə "Rosatom"un rəhbəri Lixaçevlə görüşüb. Nələrisə müzakirə edirlər, çünki hər zaman məlumat açıq olmur. Amma işğalçılarla görüşdə niyə qucaqlaşmaq, öpüşmək lazımdır, elə Zaporojye AES-dəki son səfər zamanı olduğu kimi? Mən hesab edirəm ki, sadəcə salamlaşmaq kifayətdir, hətta əl sıxmaq belə lazım deyil. Amma təəssüf ki, vəziyyət belədir. Və onun işğalçılarla qucaqlaşdığı kadrlar və fotolar Zaporojye AES-in işğalını qanuniləşdirməkdir”, - deyə xanım "Ukrayna Radiosu"na verdiyi müsahibədə qəzəblə bildirib.

O, əlavə edib ki, Qrossi avqust ayında rusların dəvəti ilə Kursk AES-i ziyarət edib. Ukrayna Silahlı Qüvvələrinin Rusiya ərazisində əməliyyata başlamasından sonra düşmən guya ukraynalıların yerli atom elektrik stansiyasına təhlükə yaratdığını iddia edən informasiya-psixoloji kampaniya aparıb.

"Və o, çox tez getdi. İndi hər şey səssizdir. Avqust ayında Zaporojye AES-in soyuducu qülləsində baş verən yanğın da Rusiyanın təxribatıdır ki, guya ukraynalıların hücum etdiyini göstərsinlər və bizsə təhlükəsizliyi təmin edirik. Hətta “Zaporojye AES-in müdafiəçisinə” adlı bir orden və ya medal belə uydurublar. Bu cür riyakarlığı başa düşürsünüzmü? Beynəlxalq təşkilatların – ATƏT, BMT Təhlükəsizlik Şurası, MAQATE – genişmiqyaslı müharibə zamanı, yəni nüvə təhlükəsi yaradan obyektlər işğal edildikdə nə qədər aciz qaldıqlarını görürsünüz. Onlar heç bir şeyə təsir edə bilmirlər və mənim fikrimcə, ciddi islahata ehtiyacları var", - deyə Koşarnaya yekun vurub.

Yaxın zamanda Prezident Vladimir Zelenski Zaporojye Atom Elektrik Stansiyasını Ukraynanın nəzarətinə hərbi yolla qaytarmağın mümkün olub-olmaması ilə bağlı fikirlərini bildirib.

"Stansiyamızı geri qaytarmaqla bağlı, mən hesab edirəm ki, hazırda yalnız siyasi addımlar var və təəssüf ki, bu addımlar kifayət deyil, əks halda stansiya artıq bizim nəzarətimizdə olardı. Zaporojye stansiyasını Ukraynanın nəzarətində saxlamaq daha təhlükəsizdir və döyüş meydanı baxımından bu imkanları görmürəm. Bəzi imkanlar var, amma onlar təhlükəlidir. Biz inanırıq ki, stansiyamızı siyasi yolla geri qaytarmalıyıq", - deyə Zelenski vurğulayıb.

Qrossinin sözlərinə görə, müharibə zamanı Zaporojye AES-in reaktorlarını yenidən işə salmaq olmaz, onlar təhlükələr mövcud olduqca "soyuq dayandırma" vəziyyətində qalmalıdır.