Ukrayna xalqı Rusiya ilə genişmiqyaslı müharibədə bir gün belə çatışmazlıqlarla üz-üzə qalmamalıdır.
TEREF xəbər verir ki, bu barədə Kanadanın baş naziri Castin Trüdo “Ukraynaya dəstək” plenar iclasında bildirib.

“Bu, Ukraynanın istədiyi və ya təhrik etdiyi münaqişə deyil. Bu müharibə bir səbəbdən başladı - Rusiyanın Ukrayna tarixini silmək və imperiyasının ərazisini genişləndirmək istəyi. Rusiya Federasiyasının hərəkətləri birbaşa hücumdan başqa bir şey deyil. Biz hər şeyi etməliyik ki, Ukrayna uzunmüddətli sülhə nail olsun, buna ukraynalılar danışıqlar masası arxasında olmadan nail olmaq mümkün deyil”, - deyə siyasətçi bildirib.

O, müttəfiqləri Ukraynaya yardımı artırmağa çağırıb. Kanadanın baş naziri Kiyevin əlavə olaraq 25 LAV III piyada döyüş maşını və digər silah növləri alacağını da açıqlayıb.

“Biz Ukrayna qoşunlarının tezliklə Almaniyada təlim keçmək üçün istifadə edəcəyi iki zirehli döyüş dəstək maşını təqdim edəcəyik. Bundan əlavə “F-16” təyyarələri üçün eniş sistemləri də təmin edəcəyik. Onlar iki ay əvvəl təhvil verilib. Biz həmçinin yaxın aylarda dörd “F-16” uçuş simulyatoru təqdim edəcəyik. Bu, milyonlarla güllə və ilk yardım dəstinə əlavədir. Dondurulmuş Rusiya aktivlərindən əldə edilən gəlirlər hesabına maliyyələşdirilən 5 milyard dollarlıq yardımın ilk tranşını da Ukraynaya köçürəcəyik”, - deyə Trüdo əlavə edib.

Bir gün əvvəl Avropa Komissiyasının sədri Ursula fon der Leyen Aİ-nin 2025-ci ilin martında Ukraynaya 3,5 milyard avro köçürəcəyini açıqlamışdı. Qeyd olunur ki, Rusiyanın tammiqyaslı işğalı başlayandan ümumilikdə Aİ və onun üzvü olan ölkələr Kiyevə 134 milyard avro köçürüb.

Bu arada Vladimir Zelenski bildirib ki, ABŞ Ukraynaya yardım kimi köçürdükləri bütün pulları geri qaytarmaq istəyir. O, həmçinin əlavə edib ki, Trampın danışdığı 500 milyard dollarlıq yardım həddən artıq şişirdilib.

Bizimyol.info