“Bu cür "kasıb" portalı 10 il gözləməyə dəyərdimi?” - Ekspertdən tənqid
26-11-2021, 15:25
“Nəhatət ki, “Rəqəmsal İcra Hakimiyyəti” portalının (rih.gov.az) pilot versiyası ( Gəncə, Quba və Masallı ) təqdim edilib. “Qeyd edim ki, ölkəmizdə mərkəzi və regional elektron hökumət quruculuğu arasındakı zaman fərqi nə az nə çox, 10 ildir. Yəni, regionlarda rəqəmsal hökumət quruculuğuna 10 il gecikmişik”.
Bakupost.az xəbər verir ki, bunu “Multimedia” İnformasiya Sistemləri Texnologiyaları Mərkəzinin direktoru, Azərbaycan İnternet Forumunun prezidenti Osman Gündüz deyib.
O.Gündüz bildirib ki, bizdə mərkəzi icra qurumlarının rəqəmsallaşmasına, mərkəzi orqanların xidmətlərinin elektronlaşmasına daha çox investisiyalar yatırılıb. İndiyədək xeyli sayda mərkəzi orqanların xidməti elektron formaya keçirilib. Uğurlarımız da daha çox mərkəzi icra orqanların elektronlaşmasında olub:
“Etiraf edim ki, regional elektron hökumət quruculuğu baxımından digər qonşu ölkələrdən geri qalırıq. Uzun müddətdir ki, ölkədə regional hökumət quruculuğu ilə bağlı müzakirələr getsə də, səlahiyyətli qurum olan VXSİ Dövlət Agentliyinin Elektron Hökumətin İnkişafı Mərkəzinin bu sahəyə diqqəti yetərli olmayıb, beynəlxalq reytinqlərdə də bu amil həmişə mənfi qiymətləndirilirdi. Yeri gəlmişkən, son illərdə bir çox rayonlar (məsələn, Şamaxı, Binəqədi və s.) öz gücləri və digər mərkəzi orqanların köməyi ilə rəqəmsallaşmada bir xeyli irəliləyişlər əldə edə bilmişdilər Bu baxımdan, bu gün vahid bir “Rəqəmsal İcra Hakimiyyəti” portalının istifadəyə verilməsi, rəqəmsal hökumət quruculuğu baxımından, regionlarda rəqəmsal transformasiyanın güclənməsi baxımından çox əhəmiyyətli bir addımdır”.
O.Gündüzün dediyinə görə, ölkədə rəqəmsal transformasiya sahəsində regionlar və mərkəz arasında ciddi rəqəmsal bərabərsizlik var:
“Bu baxımdan da düşünürəm ki, adı çəkilən layihə bu bərabərsizliyin aradan qaldırılmasında müsbət rol oynayacaq. Bununla belə, Portala nəzər salanda görmək olar ki, yerli icra qurumlarının göstərdikləri bir çox ictimai-sosial əhəmiyyətli xidmətlər elektronlaşmayıb. 39 xidmətdən cəmi 9 xidmət elektronlaşıb ki, onların bir çoxunun ictimai-sosial əhəmiyyəti, kütləviliyi olduqca aşağıdır. Yəni, daha kütləvi, daha əhəmiyyətli xidmətlər elektronlaşa bilərdi. Həmçinin, fikrimcə, rəqəmsal savadlıllğı, texnologiyalardan istifadə imkanları yetərli olmayanlar üçün regionlal əhəmiyyətli bu internet resursu daha təkmil, daha rahat istifadə imkanları ilə, interfeysi daha yaxşı, daha uyğun formada hazırlamaq olardı.
Mobil versiya isə ümumiyyətlə qüsurludur, sürüşmələr var, testdən keçirildiyi şübhə doğurur. Xeyli zaman və resurslar sərf edilməsinə baxmayraq bütün rayonlar üçün nəzərdə tutulan, regional rəqəmsal hökumət portalınnın bu qədər bəsit formada hazırlanması və təqdimatı düşündürücüdür.
Düşünürəm ki, Şamaxı İcra Hakimiyyətinin təqdim etdiyi elektron müraciət modeli daha uğurlu və daha işlək formada idi. İstənilən halda, bir daha vurğulamaq istərdim ki, regional rəqəmsal transformasiyanın daha da sürətlənməsi üçün atılan addımlar əhəmiyyətli və faydalıdır”.