Bakı şəhəri, Nizami rayonu, Özbəkistan küçəsi 13-14 ünvandakı binanın 19-cu blokundakı zirzəmidə qanunsuz inşaat işi aparıldığı iddia olunur.

Pravda.az-ın xəbərinə görə, sözügedən ünvanda yaşayan sakinlər bildirirlər ki, birinci mərtəbənin beton piltələri dağıdılıb, bünövrəsi qazılaraq, təxminən, 150-200 kisə həcmində torpaq çıxarılıb, qazıntı işi daha bir metr dərinləşdirilib. Zirzəminin gələcəkdə klinika olacağı bildirilir.

Qeyd olunub ki, Nizami Rayon İcra Hakimiyyətinin nümayəndələri məsələni ört-basdır etmək üçün obyekti inşa etdirən Nizami adlı şəxslə razılığa da gəliblər.

Məsələ ilə bağlı Pravda.az Nizami RİH-yə sorğu ünvanlayıb.

Cavabda deyilir: “Bildiririk ki, Nizami Rayon İcra Hakimiyyətinin və aidiyyəti qurumların əməkdaşlarının iştirakı ilə keçirilən monitorinq zamanı Q.Qarayev prospektindəki 10 saylı binanın zirzəmisinin torpaq qatının qazılaraq daşınması faktı aşkar olunaraq qarşısı alınıb və zirzəmi ilkin vəziyyətinə qaytarılılb. Həmçinin qeyd olunan məsələnin nəzarətdə saxlanılması üçün tərəfimizdən balanssaxlayıcı təşkilata müvafiq məktub ünvanlanıb”.

Qeyd: RİH zirzəminin ilkin vəziyyətinə qaytarılması barədə heç bir foto və ya videofakt göndərməyib.