Son günlər qalmaqalları ilə ölkə mətbuatının gündəmindən düşmək bilməyən idmançı Kamil Zeynallı ötən gün İnstaqram səhifəsində AZAL-a məxsus təyyarədə çəkilmiş maraqlı video paylaşıb. Videoda onunla bərabər aktyor Hüseyn Əzizoğlu da yer alıb. Sözün əsl mənasında təyyarədə özbaşınalıq edən dostlar heç kimi saymayıblar.

Ortalıqda var-gəl edən idmançı və aktyor təyyarə salonunun ortasında dayanaraq:”Gəlin tində dayanıb söhbət edək”, -deyə zarafat edərək əyləniblər.

İlk əvvəl onu qeyd edək ki, uçuşlar zamanı sərnişinlərin təyyarənin salonunda bu qədər rahat davranmasına icazə verilmir. Belə olan halda, Kamil Zeynallı və Hüseyn Əzizoğlu necə olur ki, təyyarədə bu qədər rahat hərəkət edirlər? Əlavə edək ki, bu Kamil Zeynallının təyyarədə sərbəstçiliyini nümayiş etdirdiyi ilk video deyil. Ötən gün idmançı təyyarədə Hüseyn Əzizoğlu ilə bağlı kağız paket şişirib partlatdığı barədə də video paylaşmışdı və qeyd etmişdi ki, “AZAL bundan sonra onları çətin təyyarəyə buraxa”. Daha sonra isə o, paylaşdığı videonu özünün İnstaqram hesabından silib.

Qaranlıq qalan bütün məqamlarla bağlı AZAL-ın mətbuat xidmətinin rəhbəri Paşa Kəsəmənski ilə əlaqə saxladıq. Xidmət rəhbəri redaksiyamıza təqdim etdiyimiz kadrların araşdırılacağını və bununla bağlı yaxın zamanda bizə məlumat veriləcəyini bildirdi.

A24.Az həmin görüntüləri sizə təqdim edir.
[media=https://www.youtube.com/watch?v=Oe3SH3sJpjQ]