Lenin hakimiyyətinin Maarif xalq komissarı Anatoli Lunaçarski özünü kilsənin təqibinə həsr edib.

Kult.az xəbər verir ki, bu barədə ABC-nin (İspaniya) jurnalisti İsrail Vyana yazıb.

Nəşrin iddiasına görə, ən qeyri-adi və vəhşi hücumun artıq 100 yaşı tamam olur:

“1918-ci ildə Moskvada xalq məhkəməsi təşkil edilib və bolşevik hakimiyyəti elan edib ki, onlar Allahı “insanlığa qarşı cinayətə və soyqırıma görə” ittiham etmək hüququna malikdirlər. Məhkəməyə sədrliyi isə Lunaçarski edib.

16 yanvar 1918-ci ildə təşkil edilən məhkəmədə çoxsaylı iştirakçı olub. Məhkəmə 5 saat davam edib və ittiham edilən stulda Bibliya qoyulub.

Əvvəlcə, “ittihamçı Rusiya xalqı” adından Allahın insanlığa qarşı “bütün cinayətləri” sadalanıb. İttihamçılar Allahın cinayətləri ilə bağlı çoxsaylı faktlar təqdim ediblər, sovet dövlətinin təyin etdiyi “müdafiəçilər” isə Allahın günahsızlığını qeyd ediblər”.

Nəşrin iddiasına görə, müdafiə tərəfi “Ağır dəlilik və psixi pozğunluq” keçirdiyi və buna görə də hərəkətlərinə nəzarət edə bilmədiyi üçün Allahın məhkəmə tərəfindən bağışlanmasını xahiş edib.

Amma məhkəmə Allahın günahkar olduğu qənaətinə gəlib və Lunaçarski qərarı elan edib: “Cənab Allah güllələnməyə məhkum edilir və növbəti gün güllələnməlidir”.

Növbəti gün məhkəmənin qərarı təntənəli surətdə icra edilib: əsgərlər dan yeri söküləndə Moskva səmasına güllələr yağdırıblar.

Bir neçə ildən sonra isə bolşevikləri başa salırlar ki, bu cür növbəti aksiyaya və kilsənin təqibinə əlavə enerji xərcləməyə ehtiyac yoxdur. Çünki Lunaçarskinin özü belə ölümündən az əvvəl bu cür cəhdləri pisləyib.