"Mədəniyyət" kanalında oktyabrın 8-dən 12-ə kimi "Azərbaycan Xalq Mahnıları Festivalı" baş tutub. Festivalda iştirak edən xalq artisti Nəzakət Teymurova Moderator.az-a açıqlamasında bildirdi ki, xalq mahnılarımızla bağlı belə festivalların keçirilməsi çox önəmlidir:

"Xalq mahnılarımız bizim dədə-babalarımızdan süzülüb gəlib. Bu gün bu mahnılarımız öz aktuallığını qoruyub saxlayırsa, onun daşıyıcılarına xalqımız adından təşəkkür etməliyik. Özünüz də görürsünüz ki, efirlərimizdə nələr baş verir, hansı mahnılar oxunur. Çox istəyərdim ki, digər festivallarımız kimi xalq mahnılarımızla bağlı keçirilən festivallar da həmişə çox yüksək səviyyədə təşkil olunsun.

Muğam ifaçıları öz professionallıqlarını qoruyurlar. Bəzi problemlər var ki, gələcəkdə onları da aradan qaldırmaq lazımdır. Dünyanın hansı ölkəsinə getsək, o mahnılar yenə bizimlədir. Bu mahnılar bizim ana laylalarımızdır. Ölkədən kənarda bizi həmişə milli musiqimizlə tanıyırlar. Biz bu ifaçıların qədrini bilməliyik. Bizim sənətdə olanlar fədakar insanlardı. Onlar həmişə mənəviyyatlarını üstün tutublar".