Türkiyənin Ukraynaya pilotsuz uçuş aparatları satması Rusiyanı çox qəzəbləndirib. Kreml Türkiyə meyvələrinə qadağa qoymaq qərarına gəlib. Bu dəfə naringilərin gətirilməsinə icazə verilmir.
Bizimyol.info xəbər verir ki, “Rospotrebnadzor” oktyabrın 29-dan etibarən pestisidlərin icazə verilən maksimum səviyyəsinin aşıldığını bildirərək Türkiyə naringilərinin Rusiyaya idxalını növbəti xəbərdarlığa qədər dayandırır. İstehlakçıların Hüquqlarının Müdafiəsi və İnsan Rifahına Nəzarət üzrə Federal Xidmət qida məhsulları ilə bağlı qanuni tələbin pozulmasını bəhanə gətirib. Guya “Xlorpirifos” pestisidinin miqdarı çox yüksəkdir.

Rusiya bir müddət əvvəl Türkiyədən gətirilən pomidorlarla bağlı da oxşar qərar qəbul etmişdi. Adətən, Kremlin belə qərarları siyasi xarakter daşıyır. Türkiyənin Krım məsələsində Ukraynanın mövqeyini müdafiə etməsi Moskvanı özündən çıxarır. Üstəlik, Kiyevə “Bayraktar” satılması Rusiyanı çox narahat edir. Kremlin özünü necə aparmasından asılı olmayaraq, Ankara mövqeyini dəyişmir.