“ABŞ-ın hansısa NATO müttəfiqi ilə daha dərin əməkdaşlığının olmasını yaxşı bir hal hesab edirəm. Bu, eyni dərəcədə Türkiyədə də aiddir”.

“Report” xəbər verir ki, bunu ABŞ dövlət katibinin Avropa və Avrasiya məsələləri üzrə köməkçisi Karen Donfrid “Anadolu” agentliyinə müsahibəsində deyib.

O, Ankaraya səfərinin məqsədini açıqlayıb: “Səfərimin məqsədi ABŞ və Türkiyənin necə daha yaxın əməkdaşlıq edə biləcəkləri barədə türkiyəli tərəfdaşlarımızla müzakirə aparmaqdır. Yunanıstanla əməkdaşlığa da tamamilə bu prizmadan baxılmalıdır. Prezident Cozef Bayden hakimiyyətə gələndə “Amerika yenidən” şüarı ilə ABŞ-ın əsas müttəfiqləri ilə əlaqələrini dərinləşdirmək, ittifaqlarını və əməkdaşlıqlarını canlandırmaq barədə arzusunu dilə gətirdi. ABŞ-ın Yunanıstanla əlaqələrində bu, hiss olunur. Eyni zamanda Türkiyə ilə əməkdaşlığımızı gücləndirmək mövzusunda qərarlıyıq”.

ABŞ dövlət katibinin köməkçisi bildirib ki, Türkiyənin F-16-lara olan marağı rəsmi Vaşinqtonu məmnun edir: “Yaxın zamanlarda bu mövzuda müzakirə etmək üçün heyətin Vaşinqtona gələcəyini bilirəm. Məsələnin həll olunması üçün dialoqu davam etdirəcəyik”.