Təbriz Ticarət Palatasının rəhbəri Yunis Jaele, 12 noyabrda keçirilən 28-ci Qeyri-neft İxracatının İnkişafı Milli Konfransının mətbuat konfransında İranın iqtisadi vəziyyəti və Şərqi Azərbaycan vilayətinin qarşısında duran çətinliklərdən danışıb.

İran mediasına istinadən, Jaele ölkənin iqtisadi sahədə yeni bazarların inkişafı istiqamətində atdığı addımları qeyd edərək bildirib ki, "Qlobal bazarlara çıxış üçün FATF-yə qoşulmaq məcburiyyətindəyik. Qlobal ticarət qaydaları futbol qaydalarına bənzəyir; əgər beynəlxalq səhnədə iştirak etmək istəyiriksə, bu qaydaları qəbul etməliyik."

O, ölkənin əsas iqtisadi problemlərindən biri kimi kapital qaçışının artması və milli valyutanın, həmçinin ümumi daxili məhsulun (ÜDM) dəyər itirməsini vurğulayaraq, bu problemlərin aradan qaldırılması üçün tədbirlər görülməsinin vacibliyini qeyd edib. Jaele, xüsusilə Afrika bazarlarına çıxış istiqamətində yeni addımların atılmasının zəruriliyini vurğulayıb və ölkədə iki məzənnəli valyutanın olması, logistik və gəmiçilik infrastrukturunun yetərsizliyini Afrikaya ixracatın qarşısındakı əsas maneələrdən olduğunu bildirib.
Eyni zamanda, milli valyutanın dəyər itirməsi, ÜDM-in azalması, iqtisadi təhlükəsizliyin zəifləməsi və illik valyuta inflyasiyasının dollara qarşı 20 faiz artımla 58 min tüməndən 70 min tümənə çatmasının özəl sektorun əsas problemlərindən biri olduğunu qeyd edib.

Jaele, Şərqi Azərbaycanın iqtisadiyyatı və inkişafının qarşısındakı maneələrə toxunaraq, vilayət iqtisadiyyatının 95 faizinin özəl sektorun əlində olduğunu vurğulayıb və bu nailiyyətin Milli İnkişaf Fondundan dəstək almadan əldə edildiyini bildirib. O, vilayətdə enerji balanssızlığı problemi ilə bağlı prezidentlə keçirilən görüşdə bəzi iri şirkətlərin 20 min meqavatdan yuxarı günəş elektrik stansiyalarının tikintisi barədə qərar qəbul etdiyini də qeyd edib.
O, vilayətə investisiya qoyuluşu ilə bağlı maneələrin aradan qaldırılması üçün bərpa olunan enerji stansiyalarının yaradılması ilə yanaşı, Araz çayından Təbrizə suyun ötürülməsi və Rusiya qaz şəbəkəsinə qoşulma kimi tədbirlərin həyata keçirilməsinin vacibliyini vurğulayıb.

Təbriz Ticarət Palatasının üzvü Məsud Benabian isə vilayətdə investisiya mühitinin problemlərinə toxunaraq, vilayəti tərk edən 12 yerli investorla əlaqə saxladığını və onların əksəriyyətinin “mədəni mühit” ilə bağlı narahatlığını ifadə etdiyini bildirib.

Palatanın digər üzvü Rza Cəfəri də Təbriz Ticarət Palatasının İdarə Heyətinin üzvü kimi, qonşu ölkələrə işgüzar səfərlərin nəticələrindən danışıb. Onun sözlərinə görə, Şərqi Azərbaycanın Rusiyaya ixracı 110%, Ermənistana ixracı isə Ticarət Palatasının səfərindən sonra 22% artıb.