Almaniyanın RTL telekanalının jurnalistləri 2018-ci ildə yoxa çıxan milyarder Karl-Erivan Haubun hələ də sağ olduğunu iddia edirlər. Onların sözlərinə görə, o, gizli şəkildə Rusiyaya gedib və Moskvada özündən 20 yaş kiçik məşuqəsi ilə yaşayır. Köln prokurorluğu araşdırmaya başlayıb. RTL-nin məlumatı təsdiqlənərsə, milyarderin qardaşı yalan şahidlikdə ittiham olunacaq.

TEREF lent.az-a istinadən xəbər verir ki, Karl-Erivan Haub Almaniyanın ən zəngin adamlarından biri hesab olunurdu. O, OBI tikinti mağazaları şəbəkəsinin daxil olduğu Almaniyanın "Tengelmann Group" holdinqinə rəhbərlik edib. 19-cu əsrdə ana tərəfdən əcdadları tərəfindən qurulan şirkət ona 2000-ci ildə təqaüdə çıxan atasından miras qalıb.

2018-ci ilin mart ayında Haubun atası vəfat edib. Bir ay sonra 58 yaşlı milyarder Alp dağlarında xizək kurortuna gedib və yoxa çıxıb. Onu sonuncu dəfə 2018-ci il aprelin 7-də İsveçrə-İtaliya sərhədindəki Klein Matterhorn dağının yamacında görüblər. Bundan sonra onunla əlaqə kəsilib.

Haubun ailəsi axtarışa "əhəmiyyətli miqdarda" töhfə verib. Beş helikopter və bir neçə xilasedicilər qrupu görmə qabiliyyətinin zəif olmasına və uçqun təhlükəsinə baxmayaraq, dağları axtarıblar. Altı gündən sonra əməliyyatın dayandırılması qərara alınıb. İtkin düşən milyarderin cəsədi heç vaxt tapılmayıb.

2021-ci ildə Köln rayon məhkəməsi rəsmi olaraq Haubun artıq həyatda olmadığını elan edib. O vaxta qədər ailə biznesi onun qardaşı Kristian Haubun nəzarətinə keçib.

Milyarderin yoxa çıxmasını araşdıran Almaniyanın RTL telekanalının jurnalistləri onun hələ də sağ olduğuna inanırlar. Bunun ilk hesabatları təxminən bir il əvvəl alman nəşri "Stern"in Haubun təzə fotoşəkillərini dərc edərkən ortaya çıxıb.

Çəkilişlərin 2021-ci ilin fevralında, yəni Alp dağlarında baş verən hadisədən üç il sonra Moskvada aparıldığı iddia edilir. Biometrik analizə görə, onların üzərində təsvir edilən kişinin itkin iş adamı olma ehtimalı 90 faizdir. "Stern" yazıb ki, görüntülər FSB-dəki mənbədən alınıb.

RTL araşdırmasında iştirak edən jurnalist Liv von Böttiçer Almaniyanın "Capital" jurnalına bu görüntülərin əsl mənşəyi haqqında danışıb. Onun sözlərinə görə, Haub yoxa çıxandan sonra qardaşı Kristian nə baş verdiyini təkbaşına anlamağa çalışıb.

O, Moskvada istifadə edilən müşahidə kameraları və üz tanıma sistemlərinə çıxışı olduğu iddia edilən özəl detektivləri və İsrail-Amerika firmasını işə götürüb. Sistemdə milyarderin şəkillərini tapmağa çalışıblar və buna nail olublar.
RTL jurnalistləri Haubun Rusiyaya məşuqəsi Veronika Ermilovanın köməyi ilə getdiyindən şübhələnirlər. "Daily Mail" onun 44 yaşında olduğunu iddia edir. "LinkedIn"in məlumatına görə, qadın xizəkçilər və alpinistlər üçün turlar təşkil edən Sankt-Peterburq şirkətində işləyir.

Haub və Ermilova arasında son telefon danışıqlarından biri bir saatdan çox davam edib. RTL jurnalistlərinin fikrincə, onlar onun Rusiyaya qaçmasına hazırlaşıblar.

Haub və Ermilova arasındakı əlaqə, RTL-nin hesab etdiyi kimi, onların səfərləri haqqında məlumatlar ilə təsdiqlənir. 2008-ci ilin iyulunda həm o, həm də məşuqəsi eyni vaxtda Moskva və Soçiyə gediblər. 2009-cu ilin may ayında hər ikisi fərqli kupelərdə olsalar da, eyni qatarda Moskvadan Sankt-Peterburqa gediblər. Həmçinin Haub və Ermilova üçün biletləri eyni şəxs alıb. Bundan əlavə, RTL onların eyni vaxtda 2010-cu ildə Omsk, 2011-ci ildə Soçi, 2014-cü ildə Bakı və 2015 və 2017-ci illərdə Moskvaya səfər etdiyini aşkar edib. Məlumata görə, bu səfərlərin hər biri gəzinti xarakterli olub.

RTL jurnalistləri Ermilovanın kəşfiyyat xidmətləri ilə əlaqəsi ola biləcəyindən şübhələnirlər. Lakin onlar bu nəzəriyyəni sınaqdan keçirə və sübut edə bilmədiklərini etiraf edirlər.

Böettiçerin sözlərinə görə, Haubun qardaşı 2021-ci ildə məhkəmə iclasından əvvəl də Moskvadakı müşahidə kameralarından görüntüləri görüb və milyarderin başına gələnləri bilib. Buna baxmayaraq, o, and içərək bildirib ki, onun sağ olmasına dair heç bir etibarlı sübut yoxdur.

RTL jurnalistlərinin şikayətindən sonra Köln şəhər prokurorluğu araşdırmaya başlayıb. Haubun xaricdə gizləndiyi təsdiqlənərsə, qardaşı yalan şahidlikdə ittiham oluna bilər.

RTL jurnalistləri hələlik qaçışın səbəbinin nə olduğunu bilmirlər. "Biz şübhələnirik ki, Karl-Erivan Haub Rusiya ilə və ya rus iş ortaqları ilə münasibətlərinə görə Qərbdə problemlər yaşaya bilər", - Böetticher iddia edib. O, hansı münasibətlərdən və problemlərdən söhbət gedə biləcəyini dəqiqləşdirməyib.