Həkim Nesvit: Liflə zəngin olan qidalar sağlam həzm üçün vacibdir.
Mədə-bağırsaq traktının xəstəlikləri əhalinin bütün yaş qruplarında baş verir və xəstəliklər arasında 4-cü yeri tutur. Mədə-bağırsaq xəstəlikləri əsasən qeyri-kafi qidalanma və qidalanma rejiminin pozulması, kifayət qədər su qəbul etməmə, həddindən artıq çəki, stres, aşağı fiziki fəallıq, yoluxucu xəstəliklər və zərərli vərdişlər nəticəsində yaranır.
Bu barədə həkim-pediatr, diyetoloq Yekaterina Nesvit "Qazeta.Ru"ya danışıb.
"Mədə, bağırsaq, qaraciyərin iltihabi xəstəlikləri, öd kisəsi və mədəaltı vəzi xəstəlikləri daha çox yayılıb. Mədə-bağırsaq traktının disfunksiyasını göstərən əlamətlər arasında ən çox rast gəlinənləri bunlardır: mədə qıcqırması və yemək borusu boyunca yanma hissi, meteorizm, qarında gurultu, ürəkbulanma, gəyirmə, ağız qoxusu, iştahsızlıq, çəki itkisi və qarının müxtəlif nahiyələrdə ağrı və qəbizlik", diyetoloq izah edib.
Həkimin sözlərinə görə, həzm orqanlarının düzgün işləməsi üçün orqanizmə lazımi maddələrin (zülallar, yağlar, karbohidratlar, minerallar, mikroelementlər, vitaminlər) daxil olmasını təmin edən balanslaşdırılmış, müntəzəm qidalanma lazımdır.
"İçki rejiminə əməl etmək həzm orqanlarının sağlamlığının qayğısına qalmaq məsələsidir. Səhər içilən ilıq su həzm sistemini "oyandıra" və onu yeməyə hazırlaya bilər. Su öd kisəsinin daralmasına səbəb olaraq öd axınının yaxşılaşdırılmasına kömək edir. Suyun bədənimizə necə təsir etdiyini və hansı funksiyaları yerinə yetirdiyini xatırlamaq vacibdir. Susuzluğu aradan qaldırmaqla yanaşı, su hüceyrənin optimal istilik rejimini qoruyur, zərərli və işlənmiş maddələri (toksinlər, hormonlar, metabolizm məhsullar) həll edir və orqanizmdən çıxarır, oynaqları zədələnmədən qoruyur, limfanın hərəkətini stimullaşdırır, qanı duruldur, qan laxtalanmasının qarşısını alır", - ekspert əlavə edib.
Mədə-bağırsaq traktının normal işləməsi üçün vacib olan ikinci şey liflə zəngin olan qidalardır. Onlar hər bir insanın rasionunda olmalıdır. Liflə zəngin olan qidalar mədə-bağırsaq traktının fəaliyyətinə müsbət təsir göstərir.
İki növ lif var - həll olunan və həll olunmayan. Demək olar ki, bütün bitkilər hər iki növü ehtiva edir, lakin fərqli nisbətlərdə.
"Lif sayəsində qidanın bağırsaqdan keçməsini yaxşılaşdırmaq, qəbizliyin qarşısını almaq mümkündür. Lif həmçinin mikrofloranın qidasıdır və şəkərin mənimsənilməsini yavaşlatmaq üçün bir yoldur. Lifin tərkibində minerallar, vitaminlər, probiotiklər, prebiotiklər var, detoksikasiyada iştirak edir, orqanizmə ətraf mühitdən daxil olan toksinləri bağlayır və xaric edir", - Nesvit bildirib.
Mədə-bağırsaq sağlamlığı üçün üçüncü əhəmiyyətli məqam isə probiotiklərdir, yəni faydalı bakteriyalardan ibarət məhsullardır. Onlar bağırsaq mikrobiomunun tərkibini yaxşılaşdırır, onun mühitini "zərərli" bakteriyalar üçün əlverişsiz edir, iltihabı azaldır və immunitet sistemini gücləndirir.
Həkim-diyetoloq yekunda qeyd edib ki, həzm sisteminin əksər orqan xəstəliklərində mədənin və bağırsağın şirə ifrazı iltihabi proseslə zədələnir. Mədə-bağırsaq xəstəliklərinin qarşısının almaq üçün rasiona riayət etmək, rijimli qidalanmaq, zərəli vərdişlərdən imtina etmək, kifayət qədər fiziki fəallıq, stressin təzahürləri və nəticələrinin öhdəsindən gəlmək lazımdır.