ABŞ Kovid-19 virusu ilə mübarizə çərçivəsində Rusiyanın göndərdiyi tənəffüs aparatlarını geri qaytarmağı qərara alıb. Rusiya isə bu iddiaların doğru olmadığını, tibbi avadanlığın yoxlanışdan sonra ABŞ-a göndərildiyini bildirib.

Amerika Birləşmiş Ştatlarının Fövqəladə Halların İdarə Olunması üzrə Federal Agentliyinin (FEMA) mətbuat xidməti Rusiyanın ABŞ-a tibbi yardım çərçivəsində göndərdiyi tənəffüs cihazlarının ötən günlərdə yanğın baş vermiş Rusiya xəstəxanalarında istifadə edilən cihazlarla eyni modeldən olduğunu, bu səbəbdən ABŞ-ın cihazları Rusiyaya geri qaytarmağa hazırlaşdığını bəyan edib. FEMA-nın mətbuat katibi Canet Montezi Moskva və Sankt-Peterburqdakı xəstəxanalarda 6 nəfər koronavirus xəstəsinin ölümü ilə nəticələnən yanğınların səbəbinin tənəffüs aparatlarındakı qüsurlar ola biləcəyini və geri qaytarmaq qərarının bu səbəbdən verildiyini bildirib.

Rusiya ABŞ-a tibbi yardımı aprel ayının əvvəllərində göndərmişdi.

Rusiya Səhiyyə Nəzarəti Federal Xidməti (Roszdravnador) Sankt-Peterburq və Moskvadakı iki xəstəxanada baş verən yanğınlarla əlaqədar səhiyyə müəssisələrində istifadə edilən tənəffüs aparatlarının kefiyyətini yoxlamağa hazırlaşdıqlarını bəyan etmişdi.

Hurriyyet.org