ABŞ Silahlı Qüvvələrinə məxsus qırıcı Suriyada İranın “Mahan Air” şirkətinin sərnişin təyyarəsinə yaxınlaşıb.
Teleqraf.com xəbər verir ki, ABŞ-ın Yaxın Şərqdəki Mərkəzi Komandanlıq Qərargahının yaydığı bəyanatda qırıcının bölgədə olan amerikalı hərbçilərin təhlükəsizliyindən əmin olmaq üçün sərnişin təyyarəsinə yaxınlaşdığını açıqlayıb.

Bildirilib ki, sərnişin təyyarəsi ABŞ hərbçilərinin bölgədəki qərargahına həddən artıq yaxınlaşdığı üçün xəbərdarlıq olaraq “F-15” qırıcısı havaya qaldırılıb.

Bəyanatda əməliyyat zamanı bütün təhlükəsizlik tədbirlərinin qorunduğu və təyyarəyə ziyan dəyməməsi üçün qırıcının onunla 1000 metr məsafə saxlandığı qeyd edilib. Obyektin sərnişin təyyarəsi olduğu aydınlaşandan sonra qırıcı bazaya qayıdıb.