Hollandiyalı siyasətçi Esther Ouwehand parlamentdə Fələstinə dəstək üçün geyindiyi Fələstin bayrağı rəngli paltarına görə iclas zalından çıxarılıb.
Sherg.az xəbər verir ki, parlament sədri Martin Bosma bunun deputatların qərəzsiz geyim qaydasını pozduğunu bildirib.

Ouwehand paltarını dəyişməyi rədd edib və salonu tərk etməli olub. Qısa müddət sonra geri qayıdan siyasətçi bu dəfə qırmızı-yaşıl rəngli, qarpız naxışlı bluz geyinib. Bu da Fələstinlə həmrəyliyin rəmzi sayılır, lakin Bosma bu dəfə etiraz etməyib.


Ouwehand sosial şəbəkədə açıqlama verərək paltarının Fələstinlə həmrəylik mesajı olduğunu vurğulayıb:
“Qarpız rəngləri Fələstin xalqına dəstəyin simvoludur. Kral çıxış edərkən Qəzzada soyqırım davam edir, uşaqlar və jurnalistlər öldürülür. Bütün baxışlar Qəzzaya yönəlməlidir.”

O, həmçinin həmin gün Qəzzadan olan jurnalist və film istehsalçısı Mohammed Zaanounu parlamentə dəvət etdiyini bildirib və ona təşəkkür edib.