Rusiya hərbi əməliyyatlar aparmaq və bölgədəi vəziyyəti gərginləşdirmək məqsədilə “Vaqner” xüsusi təyinatlı muzdlular şəklində Liviyaya gizli hərbi texnika və avadanlıqlar ötürməkdə davam edir.

Cebhe. info-nun məlumatına görə, Pentaqonun mətbuat xidmətinin ABŞ-ın Afrikadakı komandanlığına (AFRİKOM) istinadən yaydığı xəbərdə belə deyilir.

"Rusiya “Vaqner” qrupuna silah verməklə Liviyada dağıdıcı rol oynamağa davam edir", - deyə AFRİKOM-un əməliyyatlar komandanı, dəniz piyadaları generalı Bredford Herinq qeyd edib.

Afrikadakı Amerika komandanlığı Rusiyaya məxsus “Su-24”, “İl-76” hərbi təyyarələrini, “Pantsir” hava hücumundan müdafiə sistemlərini, “Tiqr” ağır zirehli maşınlarını, digər zirehli texsnikanı və “Vaqner” qrupuna aid şəxsi heyəti göstərən havadan çəkilmiş fotoşəkilləri sübut kimi təqdim edib.

General Hering vurğulayıb ki, bu görüntülər Liviyada yaranmış vəziyyətdə Rusiyanın genişmiqyaslı iştirakını əks etdirir.

Komandan bildirib ki, mövcud texnikanın növü və həcmi humanitar yardımlar deyil, hücum hərəkətləri etmək kimi pis niyyətləri nümayiş etdirir.

ABŞ-ın Müdafiə Nazirliyi bəyan edib ki, Rusiya Federasiyasının Liviyadakı qarşıdurmada ön cəbhəni hərbi texnika və yaraqlılarla fəal şəkildə təchiz etməklə 1970-ci il BMT Təhlükəsizlik Şurasının qətnaməsini pozur.

Müşfiq Abdulla
Cebhe. info