İyulun 30-da Kremldə ilk dəfə olaraq Belarusda saxlanmış Rusiya vətəndaşları barədə şərh veriblər. Rəsmi Minsk 33 Rusiya vətəndaşının Rusiyadakı “Vaqner” özəl hərbi şirkətinin muzdlu döyüşçüləri olduğunu və onların terror şübhəlisi kimi saxlandıqlarını bəyan etmişdi.

Rusiyalıları iyulun 29-da Minsk yaxınlığındakı sanatoriyada saxlayıblar.

Rusiya prezidentinin sözçüsü Dmitri Peskov iyulun 30-da bildirib ki, o hələki baş verənlərlə bağlı tam informasiyaya malik deyil. O qeyd edib ki, vəziyyətə tezliklə rəsmi kanallarla aydınlıq gətiriləcək.

Bununla belə o prezident Vladimir Putinin rusiyalıların saxlanması ilə bağlı Aleksandr Lukaşenkya zəng edəcəyini istisna etdiyini bildirib. Peskovun sözlərinə görə, Kremldə 33 Rusiya vətəndaşının saxlandığı və daha 200 nəfərin axtarışda olduğu barədə bilirlər. O bunu da deyib ki, Rusiya tərəfində sözü gedən şəxslərin qanunazidd hərəkətləri barədə heç bir məlumat yoxdur.

Peskov deyib ki, Kreml həbs edilənlərdən bir qisminin əvvəllər Ukraynada hökumət qoşunlarına qarşı döyüşdüklərinə dair informasiyanı nəzərə alacaq. Lakin o eyni zamanda deyib ki, Rusiya saxlananlardan bəzilərinin Ukrayna vətəndaşlığını tanınmır. Peskov onların Rusiya vətəndaşları olduqlarını deyib.

O bəyan edib ki, bu adamlar əvvəllər döyüşəməliyyatlarında iştirakda təqsirləndirilməyiblər. Putinin sözçüsü bildirib ki, Kremldə rusiyalıların Belarusda nə etdiklərini bilmirlər. O əlavə edib ki, belaruslar və ruslar bir-birlərinə sərbəst qonaq gedirlər.

Peskovun sözlərinə görə Rusiyada çox sayda, həm də bənzər geyimdə gəzən vəözlərini qeyri-adi aparan, yəni spirtli içkilər içməyən belarus kişi var. Müxbirlər Peskovun bu sözlərlə Belarus tərəfinə lağ etdiyini deyirlər, çünki Minskin rəsmi məlumatında saxlanan rusiyalılar barədə məhz bu ifadələr işlədilmişdi.

Vladimir Putinin sözçüsü bunu da deyib ki, ona “Vaqner” özəl hərbi şirkəti barədə heç nə məlum deyil, çünki Rusiyada özəl hərbi şirkətlər yoxdur.

Rusiyalıların saxlanması ilə bağlı bundan əvvəl bəyanat verən Ukrayna Xarici İşlər Nazirliyi bildirmişdi ki, Kiyev Minskdən Donbasda hökumətə qarşı döyüşənlərin ekstradisiyasını rica edə bilər.

Belarusda avqustun 9-da prezident seçkisi keçirilməlidir. Belarusun Milli Təhlükəsizlik Şurası bildirib ki, ölkəərazisində “Vaqner” qrupu döyüşçülərinin olması prezident seçkisinə müdaxilə niyyəti ilə bağlıldır. Peskov bildirib ki, Rusiyanın Belarusun seçkisinə qarışmaq niyyəti yoxdur. (azadliq.org)