ABŞ raket sınaqları seriyasına görə Koreya Xalq Demokratik Respublikasına (KXDR) sanksiya tətbiq edib.

AZƏRTAC xəbər verir ki, bu, Cozef Baydenin prezidentliyi dövründə ABŞ-ın Şimali Koreyaya tətbiq etdiyi ilk sanksiyadır.

Birləşmiş Ştatların maliyyə nazirinin terrorizm və maliyyə kəşfiyyatı üzrə müavini Brayn Nelson məsələyə dair bəyanatında bildirib ki, KXDR-in ötən ilin sentyabrından bəri keçirdiyi 6 raket sınağının hər biri BMT Təhlükəsizlik Şurasının qətnamələrini pozub. Sonuncu sanksiya Şimali Koreyanın kütləvi qırğın silahı və ballistik raket proqramına qarşı ABŞ-ın davam edən səylərinin bir hissəsidir.

Nazirin bəyanatında Birləşmiş Ştatların KXDR ilə dialoq və diplomatiya cəhdlərinə sadiq qaldığı, lakin Pxenyanın qanunsuz silahlanma proqramının ABŞ və beynəlxalq ictimaiyyət üçün yaratdığı təhlükəyə cavabının davam edəcəyi vurğulanıb.

Qeyd edək ki, Bayden administrasiyasının sanksiyası Şimali Koreyanın sonuncu raket sınaqlarından bir neçə gün sonraya təsadüf edir. KXDR yanvarın 5-də və 11-də hipersəsli raket sınağı keçirdiyini bəyan edib.