Ukraynanın nüvə silahı istehsal etməsilə bağlı məndə məlumat yoxdur.

Axar.az xəbər verir ki, bunu Ukrayna Milli Təhlükəsizlik və Müdafiə Şurasının katibi Aleksey Danilov deyib.

“Prezident Vladimir Zelenski nüvə silahının hazırlanmasından danışmayıb. Prezident diqqəti Budapeşt Memorandumunu imzalayanların təhlükəsizliyimizlə bağlı şərtləri yerinə yetirmələrinə yönəldib. Biz bütün nüvə silahlarını, nüvə potensialımızı təhvil verdiyimizə görə, bəyannaməni imzalayanlar müstəqilliyimizi təmin etmək səlahiyyətini öz üzərinə götürdülər. Nüvə silahı hazırlayacağımızı heç yerdə görməmişəm və eşitməmişəm”, - Danilov bildirib.

Qeyd edək ki, Kiyev 1994-cü il Budapeşt memorandumunu imzalayaraq, nüvə silahından imtina etmişdi. Bunun əvəzində ABŞ, Rusiya və Böyük Britaniya Ukraynaın ərazi bütövlüyü, müstəqilliyi və təhlükəsizliyinə təminat öhdəliyi götürmüşdü.

Zelenski Ukraynanın təhlükəsizliyinə qarant verənlərdən biri olan Rusiyanın Krım və Donbası işğal etməsi səbəbindən bu anlaşmadan çıxa biləcəklərini və nüvə silahı yaratmaq istiqamətində çalışmaya başlayacaqlarını istisna etməyib.