Cənubi Koreya və Amerika kəşfiyyatı Şimali Koreyanın Yonbyon nüvə mərkəzində 5 MVt gücündə reaktoru bağladığına dair işarələri qeydə alıb. Bunun silah dərəcəli plutonium istehsalı prosesinin bir hissəsi olduğuna inanılır.

“Report” xəbər verir ki, bu barədə “Tona İlbo” qəzeti mənbələrə istinadən məlumat yayıb.

Qeyd olunub ki, reaktor sentyabrın sonunda fəaliyyətini dayandırıb. ABŞ və Cənubi Koreya səlahiyyətliləri hesab edirlər ki, bu, nüvə yanacağının silah plutonium istehsal etmək üçün təkrar emal edilməsinə işarə ola bilər.

Vurğulanıb ki, yenidən emal prosesi reaktorun bir neçə həftə ərzində bağlanmasını, işlənmiş yanacaq millərinin çıxarılmasını və laboratoriyaya daşınmasını nəzərdə tutur.

Yonbyon reaktoru 2021-ci ilin iyulunda yenidən işə salınıb. Mütəxəssislərin fikrincə, KXDR hakimiyyəti bu reaktordan istifadə etməklə ildə 6 ilə 8 kq arasında silah plutonium əldə edə bilər.