Almaniya-Fransa Təhlükəsizlik və Müdafiə Şurasının iki ölkə liderlərinin iştirakı ilə iclası keçirilib.
Almaniya və Fransanın hakimiyyət orqanları digər tərəfdaşlarla birlikdə Avropanın müdafiə qabiliyyətini gücləndirmək üçün "uzaqmənzilli silahlar" hazırlamaq barədə razılığa gəliblər. Bu barədə Almaniya-Fransa Təhlükəsizlik və Müdafiə Şurasının iki ölkə liderlərinin iştirakı ilə keçirilən iclasının yekunlarını əks etdirən sənəddə deyilir.
Almaniya hökumətinin saytında dərc olunan sənəddə konkret hansı silah növünün nəzərdə tutulduğu göstərilməsə də, KİV yazır ki, söhbət uzaqmənzilli raketlərdən gedir.
Sənəddə Avropa İttifaqının hərbi sənaye kompleksinin gücləndirilməsi zərurətinə diqqət yetirilir:
"Xüsusilə, müdafiə istehsalında "boşluqların bağlanmasına" və digər ölkələrdən asılılığın azaldılmasına ehtiyac var. Avropa müdafiə texnologiyasını və sənaye bazasını gücləndirməklə biz müdafiə qabiliyyətimizi və imkanlarımızı təkmilləşdirəcəyik ki, bu da nəticədə] artan təhdidlər və təhlükəsizlik siyasəti ilə bağlı çağırışlar qarşısında ehtiyaclarımızı və tələblərimizi ödəyəcək".

Fransa prezidenti Emmanuel Makron Almaniya kansleri Olaf Şolts ilə danışıqlar aparıb və Almaniyaya üç günlük səfərini başa çatdırıb. Danışıqlar ərəfəsində Makron bildirib ki, Şoltsla görüşü "Ukraynanın müdafiəsi" məqsədlərinə nail olmağa kömək edəcək "tarixi qərarlar" qəbul ediləcək.
Bloomberg bildirib ki, ölkələr bu həftə təqdim oluna biləcək Aİ-nin hava hücumundan müdafiəsini gücləndirmək üçün yeni təşəbbüs hazırlayır.