Prezident Co Bayden cümə axşamı Ağ Evdə Ukrayna prezidenti Volodimir Zelenski ilə görüşməyə hazırlaşdığı vaxt Birləşmiş Ştatlar Ukraynaya 8 milyard dollarlıq yeni yardım elan edib.

Bayden verdiyi açıqlamada yardıma bir Patriot raket batareyası və raketlər, həmçinin havadan quruya döyüş sursatları və 130 kilometrə qədər məsafəni qət edə bilən dəqiq idarə olunan sürüşmə bombasının daxil olduğunu deyib.

Birləşmiş Ştatlar həmçinin gələn il əlavə olaraq 18 pilotun cəlb edilməsi ilə Ukrayna F-16 pilotları üçün təlimləri genişləndirir.

“Təxminən üç ildir ki, Birləşmiş Ştatlar Rusiya təcavüzündən azadlığını müdafiə edən Ukrayna xalqının yanında olmaq üçün dünyanı birləşdirib və mənim administrasiyamın əsas prioriteti Ukraynaya qalib gəlmək üçün lazım olan dəstəyi göstərmək olub", Bayden açıqlamasında bildirib.

Zelenski ABŞ-a təşəkkür edərək, yeni yardımın "xalqımızı qorumaq üçün ən vacib olan maddələri" ehtiva etdiyini bildirib.

“Biz bu yardımdan ən səmərəli və şəffaf şəkildə Ukraynanın qələbəsi, ədalətli və davamlı sülh və transatlantik təhlükəsizlik kimi əsas ümumi məqsədimizə çatmaq üçün istifadə edəcəyik”, Zelenski X-də yazıb.

Ukrayna lideri daha əvvəl Ağ Evdəki görüşdə Rusiyaya qarşı müharibədə qalib gəlmək planlarını müzakirə edəcəyini bildirmişdi.

Gözlənilən mövzular arasında Ukraynanın silah donorlarından Ukrayna qüvvələrinə silahlardan Rusiyanın daha dərinliklərindəki hədəflərə zərbə endirmək üçün istifadə etməsinə icazə verməsi tələbi də var. Ukrayna liderləri deyirlər ki, bu cür zərbələr Rusiyanın gündəlik raket və dron hücumlarını həyata keçirmək qabiliyyətini aşağı salmaq üçün lazımdır.

Zelenski deyib ki, o, Baydenlə çərşənbə günü Nyu-Yorkda Birləşmiş Millətlər Təşkilatının Baş Assambleyası çərçivəsində söhbət edib, ABŞ-ın Ukraynaya verdiyi dəstəyə görə Baydenə təşəkkür edib və cəbhə xəttindəki vəziyyətlə bağlı son məlumat verib.

Bu arada ABŞ-ın sabiq prezidenti Donald Tramp çərşənbə günü bildirib ki, Ukraynadakı vəziyyətin günahkarı Bayden və vitse-prezident Kamala Harrisdir və onlar Ukrayna liderlərini əraziləri Rusiyaya verməyə sövq etmək əvəzinə Ukraynaya hərbi yardım vəd edirlər.

"Bayden və Kamala Zelenskiyə heç bir ölkənin görmədiyi maddi və sursat təminatını verərək bunun baş verməsinə imkan yaradıblar", Tramp bildirib.

Tramp iddia edib ki, Rusiya qüvvələri 2022-ci ilin fevralında ölkəyə genişmiqyaslı müdaxiləyə başlamazdan əvvəl Ukrayna Moskvaya güzəştə getməli idi.

"Hər hansı bir razılaşma - ən pis razılaşma - indi əldə etdiyimizdən daha yaxşı olardı", Tramp qeyd edib.

Sabiq ABŞ lideri Ukraynanın müharibəyə son qoymaq üçün danışıqlarda indi hansı mövqeyə sahib olduğunu sorğulayıb.

"Necə bir müqavilə bağlaya bilərik? O məhv olub. İnsanlar ölüb, ölkə dağıntılar altındadır" - deyə, Tramp qeyd edib.