Konqresin ilk iş günündə ən mühüm vəzifələrindən biri Nümayəndələr Palatasının sədrinin seçilməsidir

2024-cü ilin noyabrında keçirilən seçkilərdən sonra formalaşan yeni ABŞ Konqresi yanvarın 3-də işə başlayıb. AYNA “CBS News”a istinadən xəbər verir ki, konqresmenlər Bakı vaxtı ilə saat 22:00-a ilk iclasına toplaşacaqlar.

2019-cu ildən bəri ilk dəfə Respublikaçılar Partiyası həm Senatda, həm də Nümayəndələr Palatasında çoxluğa sahibdir. Son Konqresdə, 118-ci çağırışda Respublikaçılar Partiyası Nümayəndələr Palatasına, Demokratlar Partiyası isə Senata nəzarət edirdi.

Hər iki palataya nəzarət respublikaçılara prezident seçkilərində demokrat rəqibi Kamala Harrisi məğlub edən Donald Trampın seçki platformasını həyata keçirməyə kömək edə bilər.

Trampın andiçmə mərasiminin yanvarın 20-nə planlaşdırılıb və onun Vaşinqtonda keçiriləcəyi gözlənilir.

Konqresin ilk iş günündə ən mühüm vəzifələrindən biri Nümayəndələr Palatasının sədrinin seçilməsidir. Hazırda bu vəzifəni Mayk Conson tutur. Yeni seçilmiş spiker Palatanın digər üzvləri qarşısında and içəcək.