İşğal altında olan İordan çayının qərb sahilindəki səhiyyə nazirliyi İsrailin qaçqın düşərgəsinə reydi zamanı bir nəfərin öldüyünü və doqquz nəfərin yaralandığını bildirib. İsrail ordusu şənbə günü “terrorçulara” atəş açıldığını açıqlayıb.

Ərazinin səhiyyə rəsmilərinin gecə saatlarında verdiyi açıqlamaya görə, 18 yaşlı Məhəmməd Midhət Əmin Amer İsrail qüvvələrinin Balata düşərgəsində açdığı atəş nəticəsində öldürülüb. Rəsmilər əlavə edib ki, reyd zamanı, dördünün vəziyyəti ağır olmaqla, doqquz nəfər yaralanıb.

Fələstin Qızıl Aypara Cəmiyyətinin məlumatına görə, reyd cümə gecəsi başlayıb və zorakı toqquşmalara təkan verib.

Rəsmi Fələstin xəbər agentliyi “Vafa” bildirib ki, İsrail qoşunları Avarta nəzarət-buraxılış məntəqəsindən düşərgəyə daxil olub və ətrafdakı binaların damlarında snayperlər yerləşdirib.

İsrail ordusu şənbə günü yayımladığı bəyanatda bildirib ki, “terrorla mübarizə” əməliyyatı zamanı “terrorçular ərazidə hərbçiləri hədəfə almaq üçün partlayıcı maddələr, daşlar atıb və qüvvələrə fişənglərlə hücum ediblər.”

“Qüvvələr təhdidi aradan qaldırmaq üçün terrorçulara atəş açıb”, bəyanatda qeyd olunub.

7 oktyabr 2023-cü ildə HƏMAS-ın İsrailə hücumundan sonra İordan çayının qərb sahilində zorakılıq daha da artıb. HƏMAS ABŞ, Böyük Britaniya, Avropa İttifaqı və digər dövlətlər tərəfindən terror təşkilatı kimi tanınır.

O vaxtdan bəri, Ramallada yerləşən Fələstin Səhiyyə Nazirliyinin məlumatına görə, İordan çayının qərb sahilində İsrail qoşunları və ya məskunlaşan yəhudi mühacirləri tərəfindən azı 815 fələstinli öldürülüb.

Rəsmi İsrail məlumatlarına görə, həmin dövrdə İordan çayının qərb sahilində fələstinlilər tərəfindən həyata keçirilən hücumlar nəticəsində azı 25 israilli həyatını itirib.

İsrail 1967-ci il Ərəb-İsrail müharibəsi zamanı İordan çayının qərb sahilini işğal edib.