Almaniya Kansleri Olaf Şolz, Elon Maskın ona qarşı tənqidi şərhlərinə normal yanaşdığını söyləsə də, amerikalı milyarderin Almaniyanın ifrat sağ “Almaniya üçün Alternativ” (AfD) partiyasına dəstək verərək ümumi seçkilərə müdaxilə etməyə çalışmasını narahatedici hesab edir.

Şolz bu fikirləri, ABŞ-ın yeni seçilmiş prezidenti Donald Trampın yaxın müttəfiqi olan Maskın noyabr ayında onun koalisiya hökuməti dağıldıqdan sonra kansleri “axmaq” adlandırmasına və daha sonra Almaniyanın əsas qəzetlərindən birində AfD-ni dəstəkləyən məqalə yazmasına cavab olaraq bildirib.

Almaniyanın Sosial Demokrat Partiyasının (SPD) rəhbəri olan Şolz, şənbə günü Stern jurnalında dərc olunan şərhlərində, “varlı media sahibkarlarının sosial demokrat siyasətdən razı olmamalarında və öz fikirlərini açıq şəkildə ifadə etməklərində yeni heç nə yoxdur” deyib.

“Maskın belə təhqirləri deyil, AfD kimi bir partiyanı dəstəkləməsi məni daha çox narahat edir. Bu partiyanın bəzi hissələri radikal sağ kimi tanınır, Putinin Rusiyası ilə yaxınlaşmanı təbliğ edir və transatlantik əlaqələri zəiflətmək istəyir,” deyə Şolz qeyd edib.

AfD Almaniyanın daxili kəşfiyyat xidməti tərəfindən sağçı radikal olmaq şübhəsi ilə izlənilir və bəzi Almaniya əyalətlərində artıq belə tanınır.

Almaniya, ölkənin durğun iqtisadiyyatını dirçəltmək məsələsində yaranmış fikir ayrılığı səbəbindən noyabr ayında üç partiyalı koalisiyanın dağılmasından sonra, 23 fevralda erkən parlament seçkiləri keçirəcək.

Mask yaxınlarda Welt am Sonntag qəzetində AfD-ni dəstəkləyən bir rəy məqaləsi yazaraq qalmaqala səbəb olub. Bu hadisəyə olan etirazlar qəzetin rəy bölməsi redaktoru Eva Mariya Köqelin istefasına gətirib çıxarıb.

“Alternativ für Deutschland (AfD) bu ölkənin son ümid işartısıdır,” Mask tərcümə olunmuş şərhində yazıb.

Tesla Motors-un baş direktoru əlavə edib ki, Almaniyaya etdiyi investisiyalar ona ölkənin vəziyyəti haqqında fikir bildirmək hüququ verir.

AfD-nin reytinqləri güclü olsa da, partiyanın lideri Alis Veidelin kansler olma şansı real görünmür. Belə ki, digər partiyalar sağçı radikal partiya ilə əməkdaşlıq etməyi rədd edir.