İsrail ordusu çərşənbə axşamı işğalı altındakı İordan çayının qərb sahilində reydlər keçirib. Reydlər zamanı azı 3 militantın öldürüldüyü və daha 18-nin həbs edildiyi bildirilib.

İsrail Müdafiə Qüvvələrinin bildirdiyinə görə, hava hücumu nəticəsində Tamun kəndində iki militant əsgərlərə atəş açdıqdan sonra öldürülüb.

İsrail qüvvələri Taluzada döyüşlər zamanı daha bir militantı öldürüb, bir İsrail əsgəri isə yaralanıb.

Reydlər silahlı şəxsin İordan çayının qərb sahilində Əl-Funduq şəhəri yaxınlığında avtobus və avtomobilə hücumu nəticəsində 3 nəfərin ölümü və 7 nəfərin yaralanmasından bir gün sonra həyata keçirilib.

2023-cü ilin oktyabrında HƏMAS-ın İsrailin cənubuna hücumundan və İsrailin Qəzza zolağına apardığı hərbi kampaniyadan sonra İordan çayının qərb sahilində zorakılıqlar artıb.

Fələstin səhiyyə rəsmiləri İsrail əsgərlərinin atəşi və israilli mühacirlərin hücumları nəticəsində İordan çayının qərb sahilində ən azı 818 fələstinlini öldürdüyünü bildirib. Fələstinlilər isə bu müddət ərzində onlarla israillini öldürüb.

Qəzzada müharibə 2023-cü ilin oktyabrında HƏMAS-ın İsrailin cənubuna hücum edərək 1200 adamı öldürüb, 250-yə yaxın adamı girov götürməsi ilə başlayıb. Qəzzada 100-ə yaxın girov saxlanılır, onlardan ən azı üçdə birinin öldüyü güman edilir.

İsrailin Qəzzada həyata keçirdiyi əks-hücum nəticəsində 45,5 min fələstinli həlak olub, 108 000-dən çoxu isə yaralanıb. Qəzzanın Səhiyyə Nazirliyi öz sayında yaraqlılarla mülki şəxslər arasında fərq qoymur.

Müharibə Qəzzanın geniş ərazilərini yerlə-yeksan edib və 2,3 milyon əhalisinin 90%-ni köçkün vəziyyətinə salıb.

ABŞ, Böyük Britaniya, Avropa İttifaqı və digərləri HƏMAS-ı terror təşkilatı kimi tanıyıb.