“Aşkar edilmiş ciddi nöqsanlar aradan qaldırılana qədər gəminin istismarına icazə verilməyəcək”

Finlandiyanın Nəqliyyat və Rabitə İdarəsi “Traficom” Baltik dənizində cərəyan kabelini zədələməkdə şübhəli bilinərək saxlanılan “Eagle S” tankerinin fəaliyyətini qadağan edib. AYNA xarici mediaya istinadən bildirir ki, bu barədə “Traficom”un Mətbuat Xidmətindən məlumat verilib.

“Nəqliyyat və Rabitə İdarəsi “Traficom” “Eagle S” tankerinə dövlət liman baxışını başa çatdırıb. Yoxlama zamanı aşkar edilən nöqsanlara əsasən, “Traficom” gəminin fəaliyyətini dayandırıb. Aşkar edilmiş ciddi nöqsanlar aradan qaldırılana qədər gəminin istismarına icazə verilməyəcək”, məlumatda vurğulanıb.

Bildirilib ki, yoxlama nəticəsində 32 nöqsan müəyyən edilib. Onlar tankerin yanğın təhlükəsizliyinə, naviqasiya avadanlığına, nasos otağına, ekipajın məişət şəraitinə, elektrik təhlükəsizliyinə və gəminin ümumi texniki xidmətinə təsir göstərib.