Parisin məşhur Champs Elysee xiyabanında terror hücumunda əli olduğu deyilərək, axtarışda olan belçikalı şəxs Antverpen rəsmilərinə təslim olub.

Belçika prokurorluğu bu gün bildirib ki, həmin şəxs sosial mediada özünün "bir nömrəli" şübhəli şəxs kimi axtarıldığını gördükdən sonra cümə axşamı gecə saatlarında polisə gedib. Lakin şübhəli və onun hücumla əlaqəsi barədə heç bir məlumat verilməyib.

Terror hücumunun məsuliyyyətini öz üzərinə götürən İslam Dövləti özünün mətbuat orqanı vasitəsilə hücumçunun qrupun Belçikalı Əbu Yusif adlı döyüşçüsü olduğunu bildirib.

Paris polisi isə öldürülən silahlının kimliyinin müəyyən edildiyini bildirsə də, nə adını, nə də İŞİD-lə əlaqəsi olduğunu deyib. Polisin bildirdiyinə görə, öldürülən şəxsin ailə üzvlərindən üç nəfər nəzarət altına alınıb və sorğu-sual edilib.

Fransa prezidenti Fransua Olland deyib ki, o bu hücumun terror aktı olduğuna əmindir.

Hadisə fransızların bazar günü seçkilərinə hazırlaşdığı vaxt baş verib.

Fransa prezidentliyinə namizədlərin hücumlara reaksiyaları müxtəlif olub. Ultra sağçı partiyanın rəhbəri Marine Le Pen hücuma görə "dəhşətli totalitar ideologiya olan radikal İslam"-ı günahlandırıb. Mərkəzçi namizəd Emmanuel Macron Fransanın qorxuya təslim olmayacağını bəyan edib.

Vaşinqtonda hücuma reaksiya verən ABŞ Prezidenti Donald Tramp fransız xalqına başsağlığı verərək zorakılıqlara son qoymağın vacibliyini vurğulayıb.

Cümə günü yazdığı tweet-də Prezident Tramp terror hücumunun səsverməyə "böyük təsir" göstərəcəyini bildirib.

Follow
Donald J. Trump ✔ @realDonaldTrump
Another terrorist attack in Paris. The people of France will not take much more of this. Will have a big effect on presidential election!
2:32 PM - 21 Apr 2017
16,702 16,702 Retweets 65,087 65,087 likes
"Parisdə yenə də terror hücumu. Fransa xalqı buna çox dözməyəcək. Prezident seçkilərinə böyük təsiri olacaq!" o yazıb.

ABŞ Prezidenti seçkilərdə hansı namizədi dəstəklədiyini aydın etməyib.

Fransada ötən 2 il ərzində islamçı ekstremistlərin hücumları 230-dan çox insan həyatına son qoyub.
amerikanınsesi.orq/