Armenianreport.com adlı erməni saytı Britaniya vətəndaşı olan oliqarx Rüstəm Abdullayevlə Azərbaycanlı idmançı, Dünya çempionu Vüqar Nnamazov arasında gedən münaqişədən yazı verib.

Həmin məqalə bu linkdədir. http://www.armenianreport.com/pubs/126586

Bakıda uzun zaman tikinti ilə məşğul olmuş Altes Şirkətlər Qrupunun mövqeyindən yazılmış və Azərbaycanda fəaliyyət göstərən comments.az saytında dərc edilmiş məqalənin erməni saytının marağına uyğun gəlməsi çox müəmmalıdır. Həmin məqalə Altes Şirkətlər Qrupunun Bakının Yasamal rayonunda inşa etdiyi Emerald Palace adlı binasında VİTR Fitness adlı idman və sağlamlıq mərkəzi üçün icarəyə yer götürmüş Dünya çempionu haqda təhqirlə doludur. Azərbaycanli oliqarxın və ya ona yaxın çevrənin mövqeyini dəstəkləyən yazının erməni mediasına yol tapması həm də o baxımdan maraqlıdır ki, Altes Şirkətlər Qrupunun keçmiş milli təhlükəsizlik naziri Eldar Mahmudovla əlaqəsi haqda yerli mediada dəfələrlə xəbərlər yazılıb. Rüstəm Abdullayev bu xəbərləri təkzib edir. Ancaq yerli saytlarda və sosial şəbəkələrdə yayılan məlumatlara görə, Şirkətlər Qrupunun vitse-prezidenti Fəqan Şükürovun keçmiş MTN-in Eldar Mahmudova çox yaxın olmuş bir generalı ilə qohumluq əlaqəsi də var. Rüstəm Abdullayev özü də bizimyol.info-ya müsahibəsində Eldar Mahmudovun qohumlarının Altes Şirkət Qrupuna məxsus binalarda əmlak sahibi olduğunu inkar etməyib. Armenian Report adlı erməni saytının Azərbaycanlı oliqarxla hansı ortaq marağının olduğunu demək çətindir. Ancaq Armenianreport.com bu məqaləni comments.az adlı Azərbaycan saytından götürüb və ya bu ona göndərilib. Comments.az-ın sahibi isə Altes Şirkətlər Qrupunun piar işləri ilə məşğuldur. Bu qədər təsadüf ola bilər, ya yox – bu artıq başqa bir araşdırmanın mövzusudur.