Donald Trampın ABŞ-ın yeni prezidenti seçilməsi Azərbaycanda böyük maraq və ciddi müzakirələrə səbəb olub. Verilən məlumata görə, yeni prezidentlə xüsusi yaxınlığı olan nəqliyyat naziri Ziya Məmmədovla oğlu Anar Məmmədov yaxın ətrafları ilə seçkinin nəticəsinin açıqlanmasından sonra Bakıda böyük atəşfəşanlıq edirlər.
Qeyd edək ki, verilən bu məlumatın əsassız olmadığını təsdiqləyən digər bir faktı da jurnalist Əvəz Zeynallı “Feysbuk”dakı səhifəsində paylaşıb. Onun sözlərinə görə, nəqliyyat naziri Ziya Məmmədov başının dəstəsi ilə hazırda şadyanalıq edir: “Nazir yaxın ətrafı ilə hazırda Bakıda – “Taxtalı ev” restoranında məclis qurub. Restorana kənar şəxslər buraxılmir. Ziya Məmmədov ciddi revanşa hazırlaşıir. Gürünən budur…”.
Xatırladaq ki, ABŞ-ın yeni prezidenti olan tikinti maqnatı, milyarder Donald Trampla azərbaycanlı nazir və oğlu Anar Məmmədovun ortaq bizneslərinin olduğu dünya mətbuatında da yazılıb. Məsələn, hələ aylar əvvəl “Mother Jones” jurnalı “Donald Tramp mübahisəli azərbaycanlı oliqarxla ortaq biznes qurub” başlıqlı araşdırma dərc edib. “Mother Jones” həftənin 7 günü, sutkanın 24 saatı operativ xəbərlər yayan qeyri-kommersiya online jurnalıdır. Ayda iki dəfə çap versiyası çıxır və 8 milyon tirajla satılır. Jurnal yazır ki, Donald Tramp “öz vəzifəsindən ailəsinin varlanması üçün istifadə etməkdə” ittiham olunan Azərbaycan hökumət məmurunun oğlu ilə əməkdaşlıq edir. Donald Trampın adını daşıyan dəbdəbəli otellər dünyanın bir çox şəhərlərində var. Ancaq onlardan biri diqqəti xüsusi cəlb edir.
“Bu da neftlə zəngin Azərbaycanın paytaxtında ucalan “Tramp Hotel”dir. Trampın biznes-müttəfiqi 34 yaşlı pleyboy-milyarderdir, onun atası Azərbaycanın nəqliyyat naziridir. KİV-lərin yazdığına görə, Məmmədovların sərvəti atasının siyasi əlaqələrinin nəticəsidir”- deyə jurnal yazır.
“Mother Jones” qeyd edir ki, neft milyardları sayəsində Bakı son onillikdə tanınmaz dərəcədə dəyişib. Bir-birinin ardınca ucalan göydələnlərdən biri də yelkən formasında tikilən 33 mərtəbəli “TrampTowers” otelidir. Otelin əvvəlcə ötən ay açılması planlaşdırılmışdı, lakin otelin mətbuat katibi deyib ki, açılış bu ilin sonunda olacaq.
2014-cü ildə D.Tramp bəyan edib ki, “Trump İnternational Hotel & Tower Baku” “Trump Organization”un standartlarını daşıyan ən yaxşı qlobal inkişaf layihələrindən biridir. D.Trampın adını daşıyan binaların çoxu kimi Bakıdakı otel də ona məxsus deyil. Bina Məmmədovun nəzarət etdiyi “Garant Holding” tərəfindən tikilib və onun şirkətinə məxsusdur.
Lakin Tramp adının bu oteldə istifadə edilməsinə və layihə ilə bağlı təcrübəsinə görə sərfəli komissiyon qazanıb. ABŞ prezidentinin açıqladığı maliyyə hesabatına əsasən Donald Tramp ən azından ötən il Bakıdakı otellə bağlı işlərə görə 2,5 milyon dollar alıb. Otel Trampın dəbdəbəli otellər zəncirinin bir hissəsi kimi idarə olunacaq.
Maliyyə sənədlərindən məlum olur ki, Anar Məmmədovun otelini idarə etmək üçün “THC Baku Hotel Manager Services LLC”, “THC Baku Hotel Manager Services Member Corp.” , “THC Baku Services LLC” və “THC Baku Services Member Corp.” adlı şirkətlər təsis edilib. Həmin şirkətlərin ikisində Donald Tramp 100 faiz, ikisində isə 99 faiz paya malikdir.
“Mother Jones” qeyd edir ki, Donald Trampın mətbuat katibi onun Anar Məmmədovla işgüzar münasibətlərinə dair suallara cavab verməkdən imtina edib. “Anar Məmmədov isə dəyəri 1 milyard dollardan çox olan “Garant Holding”in idarə heyətinin sədridir. Onun atası Ziya Məmmədov Azərbaycan hökumətinin ən güclü və nüfuzlu məmurlarından biri hesab olunur”- deyə jurnal yazır. Məqalədə Məmmədovun ABŞ-dakı lobbiçilik fəaliyyəti də xatırladılır.
“Tramp kimi Məmmədov da koloritli fiqurdur. Təhsilini Londonda alıb, ölkəsinin qolf federasiyasının rəhbəridir və öz veb-saytında iddia edir ki, “liderlik, qərarların qəbulu, strategiyalar, beynəlxalq işlər, siyasət, rabitə, insan haqları, ətraf mühitin mühafizəsi, vəsaitlərin cəlb edilməsi, ictimaiyyətlə əlaqələr, sponsorluq münasibətləri və publika qarşısında çıxışlar” sahəsində geniş təcrübəyə malikdir”- deyə məqalədə bildirilir. “Mother Jones” A.Məmmədov haqda sualları onun lobbi təşkilatına – Azərbaycan Amerika Alyansına göndərib, lakin suallara cavab verilməyib.(mia.az)