Belçikanın “Charleroi” hava limanında işçilərin dünən başladığı tətilin davam etməsi səbəbindən bu gün bütün uçuşlar ləğv edilib.

“Charleroi Hava Limanı” rəhbərliyi işçilərin bu gün də tətilə çıxdığını, buna görə də bütün gələn və gedən uçuşların ləğv edildiyini açıqlayıb.

Açıqlamada bu gün reysləri olan sərnişinlərdən bilet aldıqları şirkətlərlə əlaqə saxlamaları istənilib.

Hava limanının baqaj, qeydiyyat, yanacaq doldurma və təhlükəsizlik kimi departamentlərində çalışan işçilər iş şəraitinin yaxşılaşdırılması, həddindən artıq yüklənmənin azaldılması və rəhbərliyin sərt münasibətinin dəyişdirilməsi kimi tələblərlə dünən səhər saatlarında tətilə çıxıblar.

Tətillə əlaqədar dünən bütün uçuşlar təxirə salınıb.

Digər tərəfdən, aeroport rəhbərliyi və həmkarlar ittifaqı nümayəndələri problemləri müzakirə etmək və konsensus əldə etmək üçün bir araya gəlirlər.