Atışma bu gün, mayın 3-də səhər tezdən Köhnə Tiflisdə, Qudiaşvili meydanının yaxınlığında, Gürcüstanın keçmiş prezidenti Salome Zurabişvilinin evinin yaxınlığında baş verib.

Zurabişvilinin özünün “Facebook” səhifəsində verdiyi məlumata görə, səkkiz atəş açılıb, güllələrdən biri evinin həyətinə düşüb. Hadisə nəticəsində iki nəfər yaralanıb.

Onun sözlərinə görə, səhər saat 04:20 radələrində onlarla insanın iştirakı ilə qışqırıqlarla müşayiət olunan və atışma ilə bitən kütləvi dava olub.

“Bu gecə pəncərələrimin qarşısında baş verənlər məni düşündürür… Söhbət təkcə mənim şəxsi təhlükəsizliyimlə bağlı deyil – bütün şəhərin təhlükəsizliyi məsələsidir”, – deyə Zurabişvili yazıb.

O, güllələrin düşdüyü yerləri əks etdirən fotoşəkilləri dərc edərək, dövlət himayəsindən məhrum olduğunu da xatırladıb.

Gürcüstan Daxili İşlər Nazirliyi naməlum şəxslər arasında münaqişənin baş verdiyini, iki nəfərin odlu silahla yaralandığını təsdiqləyib. İdarədən verilən məlumata görə, şübhəli şəxs müəyyən edilib və onun tutulması istiqamətində tədbirlər davam etdirilir.

Musavat.com