Cəbhə bölgəsində gərginlik davam etsə də, ötən günlərə nisbətən sakitlikdir. ANS PRESS-in Müdafiə Nazirliyinə istinadən verdiyi məlumata görə, erməni silahlı bölmələri cəbhənin müxtəlif istiqamətlərində sutka ərzində Atəkəs rejimini ümumilikdə 89 dəfə pozub.

Ermənistan respublikası İcevan rayonunun Berkaber, Berd rayonunun Çinari kəndlərində yerləşən mövqelərdən Qazax rayonunun Qızılhacılı, Tovuz rayonunun Koxanəbi kəndlərində, Krasnoselsk rayonu ərazisindəki adsız yüksəkliklərdə yerləşən mövqelərdən Gədəbəy rayonu ərazisindəki adsız yüksəkliklərdə yerləşən mövqelərimiz atəşə tutulub.

Goranboy rayonunun Tapqaraqoyunlu, Gülüstan, Tərtər rayonunun Çiləbürt, Çaylı, Göyarx, Ağdam rayonunun Şıxlar, Şuraabad, Sarıcalı, Cəvahirli, Mərzili, Yusifcanlı, Xocavənd rayonunun Kuropatkino, Füzuli rayonunun Qaraxanbəyli, Horadiz , Aşağı Seyidəhmədli, Cəbrayıl rayonunun Mehdili kəndləri yaxınlığında, həmçinin Göygöl , Goranboy, Xocavənd, Füzuli və Cəbrayıl rayonlarının ərazisindəki adsız yüksəkliklərdə yerləşən mövqelərdən də Silahlı Qüvvələrimizin mövqeləri atəşə tutulub.

Düşmən cavab atəşi ilə susdurulub.

Qeyd edək ki, erməni silahlı qüvvələri 1994-cü il mayın 12-də Bişkek şəhərində Azərbaycan və Ermənistan hakimiyyətləri tərəfindən imzalanan Atəkəs rejimini hər gün pozur. Ümumiyyətlə, son günlər ermənilər cəbhədə daha da fəallaşıblar. Erməni silahlı qüvvələri cəbhə bölgəsinin müxtəlif istiqamətlərində yola saldığımız həftə ərzində 590 dəfə atəşkəs rejimini pozublar.