Məşhur rus idmançı Tenerifedə yaşamağa qərar verib

Dirəkdən tullanma üzrə ikiqat Olimpiya çempionu Yelena İsinbayeva İspaniyaya köçüb. AYNA xəbər verir ki, bu barədə “El Digital Sur” məlumat yayıb.

Məlumata görə, keçmiş idmançı Tenerifedə yaşayır. İsinbayevanın nə vaxt köçdüyü tarix bəlli deyil.

İyunun 21-də Beynəlxalq Olimpiya Komitəsinin (BOK) Etika Komitəsi təşkilatın üzvü İsinbayeva ilə bağlı yoxlamanı başa çatdırıb. Rus qadın idmançı Rusiyanın Ukraynaya qarşı işğalçı müharibəsini dəstəkləməkdə və hərbi strukturlara yardımda şübhəli bilinirdi.

Qeyd edək ki, 2023-cü ilin fevralında Ukrayna Prezidenti Volodimir Zelenski ölkənin Milli Təhlükəsizlik Şurasının rusiyalı idmançılara qarşı 50 il müddətinə sanksiya tətbiq edilməsi barədə qərarını qüvvəyə mindirib. İsinbayeva da sanksiyalara məruz qalan idmançılardandır.

Xatırladaq ki, 41 yaşlı İsinbayeva Rusiya Federasiyası Silahlı Qüvvələrinin mayorudur. Üçqat dünya çempionu 2016-cı ildən BOK-un Atletlər Komissiyasındadır.