Futbol üzrə Azərbaycan millisinin hücumçusu Renat Dadaşov Türkiyənin “Hatayspor” komandasında növbəti matçına çıxıb.

Arena.az xəbər verir ki, futbolçumuzun komandası bu gün Türkiyə Kubokunun 1/8 final mərhələsi çərçivəsində “Başakşəhər”lə qarşılaşıb.

“Hatayspor” bu rəqiblə səfərdə üz-üzə gəlib. Qarşılaşmanın əsas və əlavə vaxtında qalib müəyyənləşməyib – 1:1. Qalibi müəyyənləşdirmək üçün penaltilərə ehtiyac duyulub. 11 metrllik zərbələri daha dəqiq yerinə yetirən “Başakşəhər” 1/4 finala yüksəlib.

Dadaşov bu oyuna start heyətdə başlayıb və 90+1-ci dəqiqədə əvəzlənib. Cari mövsümdə 4 qol vurmuş hücumçu bu dəfə fərqlənə bilməyib.

Xatırladaq ki, Renat Dadaşov müqavilə ilə 2022-ci ilin iyul ayından formasını geyindiyi İsveçrənin “Qrasshopper” klubuna məxsusdur. Türkiyə klubu onu bu mövsümün sonuna kimi satınalma şərti ilə icarəyə götürüb. Dadaşov Hatay təmsilçisində 20 oyun keçirib və 4 qol vurub.