Ukraynanın Lvov şəhərində hüquq-mühafizə orqanları təxminən 81,4 milyon dollar dəyərində heroin ələ keçirib və 4 nəfəri yaxalayıblar.

Virtualaz.org yerli KİV-ə istinadən bildirir ki, bu barədə Ukrayna Baş Prokurorluğu məlumat yayıb.

“Narkotik qaçaqmalçılığı faktı ilə bağlı cinayət işi çərçivəsində aparılan xüsusi əməliyyat zamanı rekord həddə - 1 tondan çox heroin partiyası ələ keçirilib. Narkotikin “qara bazar”dakı təxmini dəyərinin 81,4 milyon dollardan çox olduğu müəyyən edilib”, - deyə bildirilib.

Araşdırmalar zamanı müəyyən edilib ki, heroin partiyası Pakistandan dəniz yolu ilə Odessa limanına gətirilib. Daha sonra ərzaq malları adı altında ölkənin qərbinə, oradan da diplomatik yük kimi Avropa İttifaqı ərazisinə aparılmalı imiş…