Məmurlardan birinin sözlərinə görə isə, ABŞ hətta hər iki əməliyyatın uğurlu olduğu bəyanatını eyni zamanda vermək arzusundaymış

SEPAH generalı Qasım Süleymaninin öldürüldüyü gün ABŞ daha bir yüksək çinli İran generalına qarşı Yəməndə əməliyyat keçirib.

Sputnik Azərbaycan bildirir ki, bu barədə öz mənbələrinə istinad edən "Washington Post" yazıb.

Onun məlumatına görə, İslam İnqilabı Keşikçiləri Korpusunun başqa bir aparıcı komandiri olan Abdul Reza Şahlaiyə qarşı ABŞ-ın keçirdiyi əməliyyat uğursuz olub.

Qəzet yazır ki, bir gündə iki əməliyyatın keçirilməsi Amerika hərbi qüvvələrinin daha geniş planı olduğundan xəbər verir.

"Washington Post"un jurnalistlərinin müraciət etdikləri rəsmi şəxslər Şahlaiyə qarşı keçirilən əməliyyatın təfərrüatını açıqlamaq istəməyiblər, sadəcə deyiblər ki, o, uğursuz olub. Məmurlardan birinin sözlərinə görə isə, ABŞ hətta hər iki əməliyyatın uğurlu olduğu bəyanatını eyni zamanda vermək arzusundaymış.

Süleymaninin ölümündən sonra İran Amerikanın İraqdakı bazalarına zərbə vurub. Xəsarət alan olmayıb.