İran Azərbaycanında sənətçi, mədəni fəal və türk dil haqları müdafiəçisi Aşqın İmaminin evində təhlükəsizlik qüvvələri tərəfindən axtarış aparıldığı bildirilir.

Hüquq müdafiə qurumu AHRAZ və Araz News kimi mənbələrə istinadən, “təhlükəsizlik qüvvələri Təbrizdə sənətçi Aşqın İmaminin evinə hücum edərək axtarış aparıblar. Onun mobil telefonu və bəzi digər əşyası məmurlar tərəfindən müsadirə olunub.”

Məmurlar sənətçidən yaxın günlərdə kəşfiyyat şöbəsinə müraciət etməsini tələb ediblər.

Abbas Lisani Telegram kanalının xəbərinə görə, “təhlükəsizlik məmurları məhkəmə qərarı göstərmədən evə giriblər. Məmurların prinsipsiz hərəkətləri və axtarış zamanı göstərdikləri davranış Aşqın xanımın uşağının qorxmasına səbəb olub.”

Aşqın İmamı illərdir musiqi, ədəbiyyat və dil hüquqları sahəsində göstərdiyi fəaliyyətləri ilə tanınır.

Onun son illərdə İran Azərbaycanının müxtəlif problemləri, o cümlədən Urmiyə gölü məsələsi ilə bağlı ifa etdiyi mahnılar sosial şəbəkələrdə geniş şəkildə paylaşılıb.