Microsoft-un çərşənbə axşamı dərc etdiyi rəqəmsal təhdidlərə dair hesabatına görə, Rusiya, Çin və İran ABŞ kimi rəqiblərinə qarşı kiber-casusluq və haker əməliyyatlarına rəhbərlik etmək üçün getdikcə daha çox cinayət şəbəkələrinə müraciət edir.

Avtoritar hökumətlərlə kriminal hakerlər arasında artan əməkdaşlıq milli təhlükəsizlik rəsmilərini və kiber-təhlükəsizlik ekspertlərini narahat edib. Onların dediyinə görə, bu, Pekinin və ya Kremlin rəqiblərini sarsıtmağa yönəlmiş addımları ilə adətən daha çox maliyyə qazancı əldə etməkdə maraqlı olan qrupların qeyri-qanuni fəaliyyəti arasında getdikcə bulanıq olan sərhədləri təmsil edir.

Məsələn, Microsoft-un analitikləri İranla əlaqəsi olan cinayətkar haker qrupunun İsrailin tanışlıq saytına sızdığını və sonra əldə etdiyi şəxsi məlumatı satmağa çalışdığını aşkar edib. Microsoft belə qənaətə gəlib ki, hakerlərin iki məqsədi var: İsrailliləri utandırmaq və pul qazanmaq.

Digər misal: Müstəntiqlər iyun ayında Ukrayna hərbçilərinin istifadə etdiyi 50-dən çox elektron cihaza sızan Rusiya cinayətkar şəbəkəsini müəyyən edib. Belə görünür onlar Rusiyanın Ukraynaya hərbi müdaxiləsinə yardım edə biləcək məlumat axtarıb. Qrupun Rusiyadan hər hansı ödənişdən başqa heç bir açıq motivi olmayıb.

Rusiya, Çin, İran və Şimali Koreya kimi dövlətlər üçün kiber-cinayətkarlarla bir araya gəlmək hər iki tərəfə fayda gətirir. Beləliklə, hökumətlər əlavə xərc çəkmədən kiber fəaliyyətlərin həcmini və effektivliyini artıra bilər. Cinayətkarlar üçün isə bu, mənfəət üçün yeni yollar və hökumətin onları müdafiə vədidir.

Microsoft-un hesabatında 2023-cü ilin iyulundan 2024-cü ilin iyun ayına qədər kiber-təhlükələri - cinayətkarların və xarici hökumətlərin hədəf sisteminə daxil olmaq və ona nəzarət etmək üçün hakerlik, nizə fişinqi, zərərli proqram və digər üsullardan necə istifadə etdiyi araşdırılıb. Şirkət müştərilərinin hər gün 600 milyondan çox belə hadisə ilə üzləşdiyini bildirib.