Bakı Dövlət Universitetinin (BDU) keçirdiyi tenderlərlə bağlı araşdırmalarımız davam edir.

Reportyor.info ötən yazıda BDU-nun “A.E.S Trading” MMC ilə bağladığı satınalma müqaviləsindən bəhs etmişdik.

Maliyyə dəyəri 2 498 018,7 AZN təşkil edən bu müqavilə BDU-nun ərazisində tikiləcək yeni qazanxana üçün avadanlıqların satın alınması ilə bağlıdır.

Yazıda qeyd etmişdik ki, tikiləcək yeni qazanxananın təkcə avadanlıqlarına 3 milyon manata yaxın vəsait xərclənməsi bu satınalma müsabiqəsinin şəffaflığı barədə müəyyən şübhələrə yol açır.

Bu dəfəki araşdırmamız isə BDU-nun inventar, avadanlıq və müxtəlif malların satın alınması ilə bağlı keçirdiyi tenderdir.

Tenderin qalibi “Everest-2022” MMC seçilib. Şirkətin təklifi 1 402 369,66 AZN-dir.

BDU bu məbləğə təkərli kreslo, yazı lövhəsi, yağ radiatoru, kağız doğrayıcı, müxtəlif ölçülü borular, künclük və bu kimi mal-materiallar almağı planlaşdırır.

Bəs bu iri məbləğli tenderin qalibi seçilən “Everest-2022” MMC-yə gəlincə, İqtisadiyyat Nazirliyi yanında Dövlət Vergi Xidmətinin reyestr məlumatlarında göstərilir ki, şirkət 11 aprel 2022-ci ildə qeydiyyata alınıb.

Nizamnamə kapitalı 100 AZN olan şirkətin hüquqi ünvanı Bakı şəhəri Qaradağ rayonu, Lökbatan qəsəbəsi, Həzi Aslanov küçəsi, ev 31A, mənzil 2-də yelrəşir.

MMC-nin qanuni təmsilçisi Babayev Fuad Şakir oğludur.

Açıq mənbələrdə şirkət haqqında hər hansı məlumata rast gəlinmir. Fuad Babayev barəsində də bilgi yoxdur.

“Dövlət satınalmaları haqqında” Qanuna görə təchizatçılara dair xüsusi tələblər mövcuddur.

Bu tələblər aşağıdakılardır:

-satınalma müqaviləsinin icrası üçün müvafiq sahədə peşəkarlığının və təcrübəsinin olması;

-satınalma müqaviləsinin icrası üçün maliyyə imkanlarının və ödəmə qabiliyyətinin olması;

-texniki imkanlarının və maddi-texniki bazasının olması;

-müvafiq tələblərə cavab verən işçi qüvvəsinin olması.

Bu tələblər Qanunun 23.4.1, 23.4.2, 23.4.3 və 23.4.4-cü maddələrində əks olunub.

“Everest-2022” MMC BDU-nun tenderinin qalibi seçilməsi ötən ilin avqust ayına təsadüf edir. Həmin vaxt şirkətin yaranmasından bir ildən artıq vaxt ötüb. Yəni, şirkətin fəaliyyəti uzun müddəti əhatə etməyib. Bir ilin, haqqında heç bir məlumat olmayan, hətta adicə veb-səhifəsi olmayan bir şirkətin “Dövlət satınalmaları haqqında” Qanunun təchizatçıya dair tələblərinə cavab verdiyi inandırıcı görünmür.

Biz hələ onu demirik ki, “Everest-2022” MMC həmin vaxt təkcə BDU-nun tenderinin qalibi seçiməyib. Yeni yaranmış, maddi-texniki bazasının hansı səviyyədə oolduğu barədə hər hansı məlumata rast gəlinməyən bir şirkəti eyni anda bir neçə işi icra layiqincə icra etməsi inandırıcı görünmür.

“Everest-2022” MMC vergi borcu olduğu halda tenderlərdə qalib seçilib. Bu barədə mediada kifayət qədər yazılıb.

Beləliklə, BDU-nun bu tenderi də müəyyən şübhələrə açır. Ən azı universitetin hansı zərurətdən tanınmayan, peşəkarlığına dair heç bir bilgi olmayan şirkətə milyon yarımlıq sifariş verməsi sualı açıq qalır.