“Ermənistan Azərbaycanla müharibəyə hazır idi. Lakin sonradan Türkiyə ortaya çıxdı. Və bu, erməni tərəfinin uğursuzluğunun əsas səbəbi oldu. Bəs biz indi hadisələrin bu cür inkişafını dayandıra bilərikmi? Bəli, əgər Dağlıq Qarabağın statusu olmadan bölgələri təslim etməyi qəbul etsək”.

KONKRET.az xəbər verir ki, bu sözləri Nikol Paşinyan bu gün hökumət üzvləri ilə keçirdiyi onlayn konfransda deyib. Paşinyan qeyd edib ki, Ermənistan hakimiyyəti belə bir vəziyyətdə də ərazi mübahisəsindəki şərtləri yaxşılaşdırmaq üçün mübarizə aparmaq qərarına gəlib. O bildirib ki, Qarabağdakı atəşkəs razılaşmasını məsələni hərbi yolla həll etməyin mümkünsüzlüyü anında imzalayıb. “İmzalanma olmasaydı, ən azı 20 minədək erməni hərbçi düşmən tərəfindən mühasirəyə alınaraq məhv ediləcəkdi”, – deyə bir daha xatırladıb Paşinyan.

O, məğlubiyyətin səbəblərindən biri kimi 2016-cı ilin aprel ayından etibarən yaranan iqtisadi-siyasi böhranı əsas gətirib: “İstəyirəm ki, xalq bilsin. Bu illər ərzində danışıqlar prosesində ərazilərin təslim edilməsi açıq şəkildə ifadə olunurdu. Ona görə də Ermənistanın siyasəti yalnız bu təklifi təxirə salmağa yönəlmişdi ”.