Bu münaqişənin indiyə qədər nizamlanmaması, vəziyyətin bu həddə gəlib çatmasının çox mühüm səbəblərindən biri ATƏT-in Minsk qrupunun öz vəzifəsini layiqincə yerinə yetirə bilməməsi olub.

Trend-in məlumatına görə, bunu Yeni Azərbaycan Partiyasının (YAP) sədr müavini - icra katibi, Baş nazirin müavini Əli Əhmədov jurnalistlərə deyib.

Ə.Əhmədov bildirib ki, bu yaxınlarda Azərbaycan Prezidenti təkcə öz mövqeyini yox, həm də xalqın mövqeyini qəti şəkildə ifadə etdi: “Əgər Minsk qrupu indiyə qədər ədalətli mövqe tutsaydı, işğalçı ilə işğala məruz qalanın hər ikisini tərəzinin eyni gözünə qoymağa çalışmasaydı, ədalətli "resept" təklif etsəydi, yəqin ki, indiyə qədər münaqişə aradan qalxardı və indi də Cənubi Qafqazda gərginliyə gətirib çıxaran bu qarşıdurma olmazdı. Azərbaycan hökuməti bundan özü üçün vacib nəticələr çıxaracaq və bundan sonra həyata keçirəcəyi siyasətində təbii ki, bütün bunlar nəzərə alınacaq”.