Beynəlxalq Cinayət Məhkəməsinin (BCM) qərarı ilə Rusiya Federasiyası Prezidentinin xaricdə həbsi casus belli, yəni müharibə elan etmək üçün formal səbəb yaradacaq. DİA.AZ reyting.az-a istinadla xəbər verir ki, bunu Rusiya Federasiyası Təhlükəsizlik Şurasının sədr müavini Dmitri Medvedev jurnalistələrin suallarını cavablandırarkən deyib.

D. Medvedevin sözlərinə görə, V. Putinin həbsi heç vaxt həyata keçirilməyəcək bir vəziyyətdir: “Amma buna baxmayaraq, onun həyata keçirildiyini təsəvvür edək. Nüvə dövlətinin hazırkı rəhbəri, məsələn, Almaniyanın ərazisinə gəlib və həbs olunub. Bu nədir? Rusiya Federasiyasına müharibə elanı! Və bu halda bizim bütün vəsaitimiz Bundestaq və Kansler ofisinə uçacaq”.

Almaniyanın ədliyyə naziri Marko Buşmanın Rusiya liderinin Almaniya ərazisinə gələcəyi təqdirdə BCM-nin qərarı ilə Berlinin onu həbs etməyə borclu olduğuna dair sözlərini şərh edən Medvedev deyib ki, bu, müharibə elanı olacaq.