ABŞ-ın müdafiə naziri Lloyd Ostinin xəstəxanaya yerləşdirildiyi və bu məsələnin üç ay ərzində prezident Baydenə belə danışılmadığı məlum olub. Məsələ ilə bağlı açıqlama verən Ostin səhv etdiyini qəbul edərək məsuliyyəti öz üzərinə götürdüyünü bildirib.

Gununsesi.info bildirir ki, “Politico”da yer alan xəbərə görə, Ostin yanvarın 1-də xəstəxanaya yerləşdirilsə də, Ağ Evin yüksək rütbəli rəsmiləri və ABŞ prezidenti Bayden yanvarın 4-də məsələdən xəbərdar olublar.

Rəsmilər bildiriblər ki, Ostin xəstəxanada qalır, lakin bütün vəzifələrini yerinə yetirməyə davam edir.

Müdafiə naziri kimi Ostin ordunun qərarlarının qəbuluna cavabdeh olan komandanlıq zəncirində prezident Baydendən sonra ikinci yerdədir.

Lloyd Ostin səhhətinin vəziyyəti ilə bağlı yazılı açıqlama verib.

“Uolter Riddəki heyrətamiz həkimlərə və tibb bacılarına mənə göstərdikləri müstəsna qayğıya və ailəmə göstərdikləri şəxsi isti münasibətə görə təşəkkür etmək istəyirəm. Həmkarlarımdan və dostlarımdan gələn bütün köməyə və xoş arzulara görə də minnətdaram. Sağaldığım üçün çox şadam və tezliklə Pentaqona qayıtmağı səbirsizliklə gözləyirəm.

Medianın şəffaflıqla bağlı narahatlığını da başa düşürəm və ictimaiyyətin lazımi şəkildə məlumatlandırılmasını təmin etmək üçün daha yaxşı iş görə bilərdim. Daha yaxşısını edəcəyimə söz verirəm. Lakin qeyd etmək lazımdır ki, bu mənim tibbi vəziyyətim idi və açıqlama ilə bağlı qərarlarım üçün tam məsuliyyət daşıyıram”, – deyə açıqlamada bildirilib.