Böyük Britaniyanın Baş naziri Kir Starmer ABŞ Prezidenti Donald Trampı Çekersdəki rəsmi iqamətgahında qəbul edib. Görüş Britaniya-Amerika münasibətlərində yeni mərhələnin əsasını qoymaqla yanaşı, qlobal geosiyasi balansda da əhəmiyyətli rezonans doğurub.

Tramp və xanımı Melania Çekersə helikopterlə gəliblər. Onları iqamətgahın qarşısında Kir Starmer və xanımı rəsmi şəkildə qarşılayıb. Prezident Tramp bu səfər çərçivəsində bir gecə öncə Vindsor qəsrində Britaniya kralı III Karl ilə iştirak etdiyi rəsmi ziyafətdə də yer almışdı. Kral Karl ziyafətdə çıxışı zamanı ABŞ və Britaniyanın “tiranlığa qarşı birgə mübarizə və Ukraynaya dəstək” mövqeyini vurğulayıb. Bu açıqlama Ukrayna Prezidenti Volodimir Zelenski tərəfindən məmnuniyyətlə qarşılanıb.

Çekers görüşündə əsas müzakirə mövzuları arasında Ukraynadakı müharibə, Rusiyaya qarşı sanksiyaların sərtləşdirilməsi, qarşılıqlı ticarət və sərmayələr yer alıb. Britaniya tərəfi ABŞ-dən ticarət məhdudiyyətləri fonunda iqtisadi əlaqələrin dərinləşdirilməsinə çalışır.

Müşahidəçilər bildirirlər ki, Starmer bu səfəri yalnız diplomatik jest kimi deyil, həm də iqtisadi strategiya kimi qiymətləndirir. Xüsusilə texnologiya və enerji sahəsində yeni sazişlərin imzalanacağı gözlənilir.

Görüşdən sonra keçiriləcək mətbuat konfransında bir sıra həssas mövzuların gündəmə gətiriləcəyi gözlənilir. Onlar arasında ABŞ-də seksual cinayətlərdə ittiham olunmuş Cefri Epsteyn ilə bağlı məsələlər, ABŞ və Britaniya arasında söz azadlığına yanaşmadakı fərqlər, eləcə də İsrail-Fələstin məsələsində mövcud olan fikir ayrılıqları var.

Xüsusilə Londonda yaxın zamanda Fələstin dövlətini tanımaqla bağlı qərarın verilə biləcəyi ehtimal olunur ki, bu da Vaşinqtonun mövqeyi ilə ziddiyyət təşkil edir. /azpolitika.info