Oktyabrın 20-də gecə saatlarında Ermənistan tərəfinin Azərbaycan Silahlı Qüvvələrinə qarşı hərbi əməliyyatlar həyata keçirməsi barədə məlumatlar yayılıb. Müdafiə Nazirliyi yayılan məlumatların həqiqəti əks etdirmədiyini deyib.

Ehtiyatda olan polkovnik Əzizağa Qənizadə isə Modern.az-a açıqlamasında yayılan xəbərlərə münasibət bildirib.

“Azərbaycan tərəfi beynəlxalq hüququn bütün norma və prinsiplərinə tam qətiyyətlə riayət edir və Ermənistan-Azərbaycan, Dağlıq Qarabağ münaqişəsinin hərb yolu ilə deyil, məhz sülh yolu ilə həll olunması yolunu dəstəkləyir.
Lakin Azərbaycanın bu səylərinə baxmayaraq, Ermənistanın hərbi rəhbərliyi guya bizim tərəfimizdən oktyabrın 20-də gecə saatlarında cəbhədə kəşfiyyat-diversiya fəaliyyətini həyata keçirməsi və onları itkilərə məruz qoyması barədə böhtan xarakterli məlumatlar yayır.
Azərbaycana qarşı söylənən bu ittihamlar tamamilə yanlışdır və həqiqətə uyğun deyil. Ermənistan tərəfi özləri cəbhənin müxtəlif istiqamətlərində atəşkəs rejimini dəfələrlə pozur və cəbhənin sərhədyanı bölgələrində yaşayan əhaliyə qarşı hücumlar edirlər. Atəşkəs rejiminin pozulması halları ya erməni hərbi rəhbərliyinin göstərişi əsasında planlı şəkildə həyata keçirilir, ya Ermənistan Silahlı Qüvvələrində nizam-intizam aşağı səviyyədədir, ya da ki, gecə saatlarında düşmən əsgərləri vahimə içərisində olduğuna görə bu hallar baş verir”.
Ehtiyatda olan polkovnikin sözlərinə görə, görünür, “Aprel döyüşləri” ermənilərə dərs olmayıb.
“Bu onun göstərir ki, bu ilin aprelində cəbhədə erməni təxribarının qarşısının uğurla alınması qarşı tərəf üçün dərs olmayıb və onlar bundan nəticə çıxarmayıblar. Ermənistan Silahlı Qüvvələri törədə biləcəyi istənilən təxribatın cavabını layiqincə alacaq və onlara qarşı Silahlı Qüvvələrimiz tərəfindən daha sərt tədbirlər görüləcək”.