Ermənipərəst amerikalı senator Adam Şiff (demokrat, Kaliforniya ştatından) ipoteka dələduzluğunda şübhəli bilinir. Merilend ştatının prokurorluğu onunla bağlı cinayət istintaqına başlayıb.

Bu barədə "Fox News" telekanalı mənbələrə istinadən xəbər verib.

Federal Mənzil Maliyyələşdirmə Agentliyi hesab edir ki, Şiff daha əlverişli kredit şərtləri əldə etmək üçün dəfələrlə yanlış bank sənədləri və əmlak məlumatları təqdim edib. Vəziyyətdən asılı olaraq, o, əsas yaşayış yeri kimi ya Merilenddəki, ya da Kaliforniyadakı evini göstərib.

Daha əvvəl ABŞ Ədliyyə Nazirliyi Nyu-York ştatının baş prokuroru Letisiya Ceymslə bağlı oxşar hüquq pozuntusu ilə əlaqədar istintaqa başlayıb. Dövlət ittihamı iddia edir ki, Ceyms ipoteka rəsmiləşdirərkən əsas yaşayış yeri kimi Virciniya ştatında sahib olduğu mənzili göstərib, halbuki vəzifəli şəxs kimi o, iş yerində yaşamalıdır, həmçinin daha əlverişli kredit şərtləri əldə etmək üçün Nyu-Yorkdakı əmlakının dəyərini azaldıb. Bundan əlavə, ipoteka ərizəsində ər kimi öz atasını göstərib.