"Hazırda ölkədə hər hansı dərmanın kəskin qıtlığı yoxdur".

DİA.AZ bildirir ki, bunu səhiyyə naziri Teymur Musayev bu gün jurnalistlərə açıqlamasında deyib.

Nazir bildirib ki, dünyada baş verən son hadisələr səbəbindən dərman istehsalında istifadə olunan xammalın qiymətinin artırılmasına gətirib çıxarıb:

"Bu da müəyyən dərmanların qiymətində nisbətən artıma səbəb olur. Vəziyyət daim nəzarət altındadır. Lazımi tədarüklər görülüb, ehtiyac həcmləri təmin edilib. Dərmanların qiymətini Tarif Şurası müəyyən edir. Strateji baxımdan vacib olan dərmanların qiyməti nəzarət altındadır və bu tənzimlənir".

DİA.AZ xatırladır ki, alıcılar ölkədə kəskin dərman qıtlığı olduğunu bildirir. Xüsusilə apteklərdə hərarətə qarşı dərmanlar, ağrıkəsicilər, eləcə də son zamanlar yayılan xəstəliyin müalicəsində istifadə olunan preparatlar tapılmır.

Məsələ hətta Milli Məclisdə də müzakirə olunub. Deputatlar dərman qıtlığı problemini xüsusi vurğulayıblar.

DİA.AZ qeyd edir ki, əslində problemin yaranma səbəbi heç də səhiyyə nazirliyindən və yaxud da hansısa azərbaycanlı məmurdan birbaşa asılı deyil. Yəni ekspertlər burada Rusiya-Ukrayna müharibəsini başlıca problemyaradıcı faktor kimi nişan verirlər.

Amma nədənsə bizim məmurlar məhz fəaiyyətsiz qaldıqlarından problemin üzərinə "bizdə belə bir problem yoxdur" deyərək yürüməyi yol kimi görürlər ki, bu da yanlışdır və ortadakı problemin həllində fayda vermir.

Problemlə bağlı bir videosüjeti də təqdim edirik: