Sakinlər sözügedən MTK-nın tikdikləri binanın həyətini genişləndirmək üçün ağacları bilərəkdən məhv edib, "külək qırıb" görüntüsü yaratmasını istisna etmirlər.
BAKI, 27 iyun — Sputnik. Yasamal rayonu, Həsən bəy Zərdabi 69 ünvanında ağaclar müəmmalı şəkildə kökündən qopur. Sputnik Azərbaycan-ın məlumatına görə, bu barədə sosial şəbəkədə sakinlər bildirib.

Şəymən Bayramova adlı Facebook istifadəçisi yazıb ki, Yasamalda 3 ağac müəmmalı şəkildə kökündən aşıb.
"Guya ağaclar gecə əsən küləyin təsirindən qırılıb. Ərazidə yaşayan sakinlər isə iddia edir ki, dünən həmin ərazidə bu ağacları kökündən qıracaq qədər şiddətli külək olmayıb. Hər tərəfdən hündürmərtəbəli binalarla əhatə olunmuş ərazidə üç sağlam ağacın eyni vaxtda, peşəkarcasına qırılması şübhə doğurur." - Bayramova bildirib.
O qeyd edib ki, Zərdabi 69 ünvanında yerləşən beşmərtəbəli bina uzun müddətdir qəzalı vəziyyətdədir və üzbəüzdə (5-6 metr aralıda) yeni hündürmərtəbəli binalar inşa edilir. Uzun müddət tikintisi davam edən inşaatın qarşı binada yaşayan sakinlərlə MTK arasında yaşanan anlaşılmazlıq səbəbindən ləngidiyi qeyd edilib.
"Onu da deyək ki, həmin binanın ərazisindəki digər ağaclar da zaman- zaman müəmmalı şəkildə kökündən aşıb. Odur ki, sakinlər sözügedən MTK-nın tikdikləri binanın həyətini genişləndirmək üçün ağacları bilərəkdən məhv edərək "külək qırıb" görüntüsü yaratmasını istisna etmirlər" - Ş.Bayramova yazıb.

Ekologiya və Təbii Sərvətlər Nazirliyindən Sputnik Azərbaycan-ın sorğusuna cavabda bildirilib ki, ağacların aşma səbəbləri və sakinlərin iddiaları araşdırılacaq.