Ümümdünya Səhiyyə Təşkilatının (ÜST) üzv dövlətləri agentliyin ən böyük hökumət maliyyələşdiricisi olan ABŞ-ın təşkilatdan çıxması ilə bağlı Prezident Trampın qərarından sonra, büdcənin 400 milyon dollar azaldılması məsələsini müzakirə edəcəklər. Bu barədə bazar ertəsi ictimailəşdirilən sənəddə məlumat verilib.

ÜST-ün illik idarə heyəti iclasının açılışında təşkilatın Baş direktoru Tedros Adhanom Qebreyesus ÜST-ün fəaliyyətini və son islahatlarını müdafiə edərək, ABŞ-ı çıxış qərarına yenidən baxmağa və təşkilatla gələcək dəyişikliklərə dair dialoqa girməyə çağırıb.

“Biz ABŞ-dan və bütün üzv dövlətlərdən daha yaxşı xidmət göstərə bilməyimiz üçün təklifləri məmnuniyyətlə qəbul edərik”, – deyə o bildirib.

Büdcə ixtisarı 3-11 fevral tarixlərində Cenevrədə keçiriləcək görüşdə müzakirə olunacaq. Həmin iclasda üzv dövlətlərin nümayəndələri təşkilatın maliyyələşdirilməsi və 2026-2027 dövrü üçün fəaliyyətini müzakirə edəcəklər.

Bazar ertəsi yayımlanan sənədə əsasən, idarə heyəti büdcənin əsas proqramlar hissəsinin 5,3 milyard dollardan 4,9 milyard dollara endirilməsini təklif edir. Bu, əvvəlcə təklif olunan və poliomielitin aradan qaldırılması, fövqəladə halların həlli kimi sahələri əhatə edən ümumi 7,5 milyard dollarlıq büdcənin bir hissəsidir.

“Ən böyük maliyyə donorunun çıxışı ilə büdcə əvvəlki kimi qala bilməzdi”, – sənəddə qeyd olunur. ABŞ ÜST-ün ən böyük hökumət donorudur və təşkilatın ümumi maliyyələşdirilməsinin təxminən 18%-ni təmin edir. ÜST artıq ABŞ-ın bu qərarından sonra bəzi xərclərin azaldılması addımlarını atıb.

Bununla belə, bəzi şura nümayəndələri ÜST-ün qarşıdakı çətinliklərə baxmayaraq strateji istiqamətini qoruyacağını göstərmək istədiklərini vurğulayıblar.

4,9 milyard dollar, təxminən 2024-2025 dövrü üçün nəzərdə tutulan əsas proqram büdcəsinə bərabərdir.

Tramp iki həftə əvvəl, prezidentlik vəzifəsinə başladığı ilk gündə ABŞ-ın ÜST-dən çıxması prosesini başlatdı. ABŞ qanunvericiliyinə görə, bu proses bir il çəkəcək.